ساياسات نۇربەك ەلدەگى ۋنيۆەرسيتەتتەردە وقىتۋ قۇنىنا قاتىستى پىكىر ايتتى

ونىڭ ايتۋىنشا، مينيسترلىك وقۋ اقىسىنىڭ شامادان تىس وسۋىنە جول بەرمەۋ ماقساتىندا جوعارى وقۋ ورىندارىمەن بىرلەسىپ جۇمىس ىستەپ جاتىر.
- قازىرگى ۋاقىتتا ءبىز وقۋ اقىسىنىڭ ءوسىمى 10-15 پايىزدان اسپاۋىن، سونداي-اق ونىڭ ينفلياتسيا مەن شىعىندارعا سايكەس كەلۋىن قامتاماسىز ەتۋ ءۇشىن جوعارى وقۋ ورىندارىمەن تىعىز جۇمىس ىستەپ جاتىرمىز. ءىس جۇزىندە تاريف دەڭگەيىن تەجەپ تۇرمىز. مەملەكەت جوعارى ءبىلىم الۋعا قولايلى جاعداي جاساۋدى ەرەكشە باقىلاۋدا ۇستاپ تۇر. ماسەلەن، كەيبىر ەلدە جوعارى ءبىلىم الۋ مۇمكىندىگىن مەكتەپ تۇلەكتەرىنىڭ سونشالىقتى كوپ بولىگىنە بەرۋ قاجەت ەمەس دەگەن پىكىر بار. ال ءبىز جوعارى ءبىلىم الۋ مۇمكىندىگىن قولداۋ كەرەك دەپ سانايمىز، - دەدى س. نۇربەك ۇكىمەت وتىرىسىنان كەيىنگى باسپا ءسوز ءماسليحاتىندا.
وسى ورايدا ول ەلىمىزدە گرانت سانى ارتقانىن، «ۇلتتىق قور - بالالارعا» باعدارلاماسى مەن «كەلەشەك» جۇيەسى ىسكە قوسىلعانىن ەسكە سالدى.
- ۇلتتىق ۋنيۆەرسيتەتتەردە وقۋ اقىسى بەكىتىلگەن جانە ونىڭ جىل سايىنعى ءوسۋىن باقىلاۋدا ۇستايمىز. جالپى العاندا، قازاقستاندا جوعارى ءبىلىم الۋ ءۇشىن ءتيىستى جاعداي جاسالعان، - دەدى مينيستر.
بۇعان دەيىن حابارلانعانداي، ەلىمىزدەگى ۋنيۆەرسيتەتتەر مەن ءبىلىم باعدارلاماسىنا قاراي وقۋ قۇنى 600 مىڭ تەڭگەدەن باستالىپ، 4 ميلليون تەڭگەگە دەيىن جەتتى.