ساياحاتتاۋعا ەڭ قاۋىپسىز 15 قالا انىقتالدى
استانا.قازاقپارات - تۋريستەرگە ەڭ قاۋىپسىز قالالاردىڭ جاڭا رەيتينگى جاريالاندى. ءبىرىنشى ورىنعا كانادانىڭ مونرەال قالاسى شىقتى.
ال ۇزدىك ۇشتىكتى شۆەيتساريانىڭ تسيۋريح جانە نيدەرلاندتىڭ امستەردام قالالارى تولىقتىردى. بۇل تۋرالى Euronews جازدى، دەپ حابارلايدى turkystan.kz.
رەيتينگتى امەريكالىق Berkshire Hathaway Travel Protection ساقتاندىرۋ كومپانياسى ازىرلەگەن. زەرتتەۋ بارىسىندا ا ق ش تۋريستەرى ءجيى باراتىن 38 قالا قاراستىرىلعان. ساۋالناماعا قاتىسقان 1500 دەن استام ساياحاتشى وزدەرى بارعان قالالاردىڭ قاۋىپسىزدىگىن باعالاعان.
زەرتتەۋشىلەر تۋريستەردىڭ جەكە تاجىريبەسىنە قوسا Numbeo, The Economist جانە GeoSure Global سياقتى ۇيىمداردىڭ قاۋىپسىزدىك كورسەتكىشتەرىن دە ەسكەرگەن.
ناتيجەسىندە 2027 -جىلى ساياحاتتاۋعا ەڭ قاۋىپسىز 15 قالا انىقتالدى. ولاردىڭ توعىزى ەۋروپادا ورنالاسقان.
2027-جىلى تۋريستەر ءۇشىن ەڭ قاۋىپسىز 15 قالا:
مونرەال - كانادا
تسيۋريح - شۆەيتساريا
امستەردام - نيدەرلاند
توكيو - جاپونيا
رەيكياۆيك - يسلانديا
وسلو - نورۆەگيا
سينگاپۋر - سينگاپۋر
ۆەنەتسيا - يتاليا
سيدنەي - اۋستراليا
گونولۋلۋ – ا ق ش
دۋبلين - يرلانديا
كوپەنگاگەن - دانيا
بارسەلونا - يسپانيا
سان- فرانتسيسكو – ا ق ش
پاريج - فرانسيا
بيىلعى رەيتينگتە مونرەال ايتارلىقتاي جوعارىلاعان. بىلتىر 16-ورىندا تۇرعان قالا ەندى ءبىرىنشى ورىنعا شىقتى. ساراپشىلار مۇنى قالاداعى قىلمىس دەڭگەيىنىڭ سالىستىرمالى تۇردە تومەندىگىمەن، قوعامدىق كولىكتىڭ قاۋىپسىزدىگىمەن جانە تۋريستەر ءۇشىن قولايلى جاعدايلارمەن بايلانىستىرادى.
ال 2026 -جىلعى رەيتينگتە ءبىرىنشى ورىندا بولعان يسلانديا استاناسى رەيكياۆيك بيىل بەسىنشى ورىنعا تۇسكەن. سيۋريح ءۇشىنشى ورىننان ەكىنشىگە، امستەردام تورتىنشىدەن ءۇشىنشى ورىنعا كوتەرىلگەن.
زەرتتەۋشىلەر رەيتينگتىڭ 2026 -جىلعى جازدا جينالعان دەرەكتەرگە نەگىزدەلگەنىن ەسكەرتەدى. سوندىقتان بۇل ءتىزىم قالالارداعى قازىرگى قاۋىپسىزدىك جاعدايىن تولىق كورسەتپەۋى مۇمكىن.
سونداي-اق رەيتينگ الەمنىڭ بارلىق قالاسىن قامتىمايدى. ول الدىن الا تاڭدالعان 38 تۋريستىك باعىتتىڭ ىشىندەگى قاۋىپسىزدىك كورسەتكىشتەرىن سالىستىرۋ ارقىلى جاسالعان.
ماماندار ساياحاتقا شىعار الدىندا قالاداعى قاۋىپسىزدىك جاعدايىن، جەرگىلىكتى ەرەجەلەردى جانە ءوز ەلىڭىزدىڭ رەسمي تۋريستىك ۇسىنىمدارىن تەكسەرۋگە كەڭەس بەرەدى.
