ساياحاتشى تۇرىك وتباسى اقتاۋعا كەلدى
اقتاۋ. KAZINFORM - تۇركيانىڭ انكارا قالاسىنان قازاقستاننىڭ استانا قالاسىنا بارا جاتقان تۇرىك ساياحاتشىلارى بۇگىن اقتاۋعا جەتتى. يديل مەن بۋراك ەسىمدى ەرلى-زايىپتى ەكى جاستاعى ۇلىمەن بىرگە تۇركيادان 12-تامىزدا شىققان. ولار دۇنيەجۇزىلىك كوشپەندىلەر ويىندارىن ءوز كوزىمەن كورۋ ءۇشىن، ەلىمىزگە ارنايى اتباسىن تىرەدى.
- دۇنيەجۇزىلىك كوشپەندىلەر ويىندارىنىڭ تۇراقتى جانكۇيەرىمىز. بيىلعى ويىن باۋىرلاس قازاق ەلىندە وتەتىنىن ەستىپ قۋاندىق. كەلىپ قاتىسۋعا قازاقستان تۋريزم مينيسترلىگىنەن رۇقسات الدىق. شاعىن اۆتوبۋس ساتىپ الىپ، ءىشىن الىس جولعا جايلى ەتىپ جابدىقتادىق. كولىگىمىزدىڭ اتاۋىن جاقسى ىرىمعا بالاپ «كوشپەندى» دەپ قويدىق. بۇگىن اتاجۇرتىمىزدا قوناقاسى جەگەن سوڭ، استاناعا قاراي شىعامىز. ساپارىمىزدىڭ كوڭىلدى ءارى ەستە قالارلىقتاي ءوتىپ جاتقانىنا قۋانىپ كەلەمىز، - دەيدى ساياحاتشى بۋراك دۋران.
تۇرىك وتباسى اقتاۋعا باكۋدەن كەمەمەن جەتكەن. كەشە تۇندە اقتاۋ تەڭىز پورتىنا ءتۇستى. باۋىرلاس ۇلت وكىلدەرى قازىر قالاداعى قوناقۇيلەردىڭ بىرىندە تىنىعىپ جاتىر. كەشكە قاراي كولىكتەرىمەن استاناعا جولعا شىعۋدى جوسپارلايدى.
جيھانكەزدەر قازاق جەرىندە وزدەرىنە كورسەتىلگەن سىي- قۇرمەتكە ريزا بولعاندارىن جەتكىزدى.
بۇعان دەيىن تۇركيالىق وتباسىنىڭ اۆتوبۋسپەن انكارادان استاناعا كوشپەندىلەر ويىنىنا كەلە جاتقانىن جازعان ەدىك.
اۆتور
اياگوز ءىزباساروۆا
