ساتقاليەۆ: اتوم ەلەكتر ستانساسىنا قاجەت سۋ - بالقاشتىڭ بۋلاناتىن سۋىنىڭ 0,3 پايىزى عانا
استانا. KAZINFORM - اتوم ەلەكتر ستانساسىنا قاجەتتى سۋ كولەمى بالقاشتىڭ بۋلاناتىن سۋىنىڭ 0,3 پايىزىن عانا قۇرايدى. بۇل تۋرالى بۇگىن اقمولا وبلىسىنىڭ جاستارىمەن كەزدەسكەن ەنەرگەتيكا ءمينيسترى الماسادام ساتقاليەۆ ايتتى.
«قازىرگى ۋاقىتتاعى زاماناۋي اتوم رەاكتورى سۋدى كەز كەلگەن ەلەكتر ستانساسى سياقتى تۇتىنادى. ياعني، بالقاش كولى سۋىنىڭ جالپى بۋلانۋىنىڭ 0,3 پايىزى عانا ەكەنىن ەسەپتەپ شىعاردىق. دەمەك، مولشەرى بولماشى عانا. مۇنىڭ ۇستىنە رەاكتوردىڭ، جالپى ستانسانىڭ اشىق سۋ ايدىنىمەن تىكەلەي ءتۇيىسۋى بولمايدى. سۋ سالقىنداتقىش توعاندى تەك تولىقتىرىپ وتىرۋ ءۇشىن عانا قولدانىلادى. ياعني، زاماناۋي ستانسالاردا سۋ ءبىر باعىتقا عانا اعادى. وندا جابىق كونتۋر بار. قازىرگى زامانعى رەاكتورلاردا بۇكىل سۋ اينالمالى سانالادى»، - دەدى ول.
سونىمەن قاتار ءمينيستردىڭ ايتۋىنشا، ا ە س-كە قولدانىلاتىن وتىن قايتا وڭدەلەدى.
«كوپتەگەن ەل يادرولىق وتىندى وزدەرىمەن بىرگە الىپ كەتەدى. ياعني، ۆەندورلار ونى بىزدە قالدىرمايدى. شارتتىڭ ءبىرى يادرولىق وتىندى وزدەرىمەن الىپ كەتۋگە بايلانىستى. ال قالدىراتىن ەلدەر ءتيىستى ساقتاۋدى قامتاماسىز ەتەدى. بۇل ستانسانى سالۋ قۇنىنىڭ ىشىنە كىرەدى. جانە ءبىز ونى كەيىننەن قالاۋىمىزعا قاراي قايتادان وڭدەپ، قوسىمشا تابىس تابا الامىز»، - دەدى الماسادام ساتقاليەۆ.
