ساۋساق ءىزىن تاپسىرۋدان باس تارتقان شەتەلدىكتەر ەلدەن قۋىلادى
پاۆلودار. KAZINFORM - داكتيلوسكوپيالىق تىركەۋ تەك شەتەلدىك ازاماتتار ءۇشىن مىندەتتى. ودان باس تارتقاندار ەل اۋماعىنان ءماجبۇرلى تۇردە شىعارىلادى.
وبلىستىق پوليتسيا دەپارتامەنتىنەن حابارلاعانداي، ەل اۋماعىندا ۋاقىتشا، تۇراقتى تۇرۋعا رۇقسات نەمەسە ۆيزا الۋ ءۇشىن جۇگىنگەن شەتەلدىكتەر مەن ازاماتتىعى جوق ادامداردى مىندەتتى داكتوتىركەۋ 1- قاڭتاردان باستاپ جۇزەگە اسىپ جاتىر.
جىل باسىنان بەرى پاۆلودار وڭىرىندە مۇنداي تىركەۋدەن 1591 شەتەلدىك وتكەن.
«داكتوتىركەۋدەن ءوتۋ ءۇشىن ازاماتتار كوشى-قون قىزمەتىنە جۇگىنۋى كەرەك. كوشى-قون قىزمەتىنىڭ ءاربىر بولىمشەسىندە ارنايى جابدىقتار قويىلعان. قىزمەت الۋشى تۇلعالار بەلگىلەنگەن نۇسقاۋلىققا سايكەس ساۋساق ءىزىن قالدىرادى. داكتيلوسكوپيادان وتكەن سوڭ ازاماتقا انىقتاما بەرىلەدى، ونى ءارى قاراي قۇجات راسىمدەگەندە حالىققا قىزمەت كورسەتۋ ورتالىعىنا نەمەسە اۋماقتىق كوشى-قون قىزمەتتەرىنە ۇسىنا الادى» دەپ ءتۇسىندىردى پوليتسيا دەپارتامەنتىنەن.
ساۋساق ءىزىن قالدىرۋدان باس تارتقان جاعدايدا شەتەلدىك ازاماتتار ەلدەن شىعارىلادى.
