ساربازدار قاربالاستان قالىپتى تىرلىككە ورالا باستادى

Фото: Ұлттық ұлан
Фото: Ұлттық ұлан

استانا. KAZINFORM - بۇگىندە كەيبىر ايماقتاردا سۋ تاسقىنىنىڭ بەتى قايتىپ، قارۋلى كۇشتەردىڭ جەكە قۇرامى مەن اسكەري تەحنيكاسىنىڭ ءبىر بولىگى باتىس قازاقستان، سولتۇستىك قازاقستان جانە اقمولا وبلىستارىنان تۇراقتى ورنالاسۋ پۋنكتىنە قايتارىلعان.

بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ق ر قورعانىس مينيسترلىگىنىڭ رەسمي وكىلى رۋسلان جانگۋلين ايتتى.

ساربازدار اجەپتاۋىر جۇمىستى اتقارعانىن اتاپ وتكەن ءجون.

ماسەلەن، جايىق وزەنىنىڭ جاعالاۋىن نىعايتۋ جۇمىستارى جۇرگىزىلىپ، قۇلسارى كەنتىندە 2 مىڭ مەترلىك جاعالاۋ اۋماعى تازارتىلدى.

«باسشى اتا» ورتالىق زيراتىنىڭ، 15-ورتا مەكتەبىنىڭ جانە تۇراقتى سۋ قورى ساقتالعان الاڭداردىڭ اۋماعىنا دەزينفەكتسيا جۇرگىزىلدى.

«اقتوبە وبلىسىندا ويىل وزەنى ارقىلى جەرگىلىكتى حالىقتى، تەحنيكا مەن جۇكتەردى پاروممەن جەتكىزۋ جانە تاسىمالداۋ جالعاسىپ جاتىر. وتكەن تاۋلىكتە 5 پارومورەيس ورىندالىپ، 17 كولىك، 20 ادام جانە 2 توننا جۇك تاسىمالداندى. جايساڭباي اۋىلىندا جاعالاۋدى نىعايتۋ جۇمىستارى جالعاسۋدا. اقتوبە قالاسىندا رادياتسيالىق-حيميالىق جانە بيولوگيالىق قورعاۋ بولىمشەسىنىڭ ماماندارى الەۋمەتتىك ماڭىزى بار وبەكتىلەرگە دەزينفەكسيالاۋ جۇمىستارىن جۇرگىزىپ جاتىر»، - دەدى رۋسلان جانگۋلين.

سولتۇستىك قازاقستان وبلىسىندا اسكەري قىزمەتشىلەر پەتروپاۆل قالاسىندا، بەسكول كەنتىندە جانە سميرنوۆ اۋىلىندا گۋمانيتارلىق كومەكتى تۇسىرۋگە اتسالىسقان.

اسكەري پارومدارمەن 2 رەيس جاسالىپ، پريبرەجنىي اۋىلىنا 326 ادام جەتكىزىلدى.

اقمولا وبلىسىندا اسكەري قىزمەتشىلەر ەسىل اۋدانىنىڭ زارەچنىي كەنتىندەگى اكىمدىكتى، سۋ سورۋ ستانتسياسىن، اسحانا مەن ناۋبايحانانى ەلەكترمەن قامتاماسىز ەتتى.

27-ناۋرىز بەن 29-ءساۋىر ارالىعىندا سۋ تاسقىنىنا قارسى ءىس-شارالارعا قارۋلى كۇشتەردىڭ جەكە قۇرامىنان 6153 ادام، 255 تەحنيكا، ارميالىق اۆياتسيانىڭ 12 تىكۇشاعى مەن 5 اسكەري-كولىكتىك ۇشاعى جۇمىلدىرىلعانىن اتاپ وتكەن ءجون.

سوڭعى جاڭالىقتار