سارباز كوماعا ءتۇستى: قورعانىس مينيسترلىگى رەسمي مالىمدەمە جاسادى
استانا. KAZINFORM – ق ر قورعانىس مينيسترلىگى جامبىل وبلىسى وتار اۋىلىنداعى اسكەري بولىمدە مەرزىمدى قىزمەتىن وتەپ جاتقان ساربازدىڭ كوماعا تۇسۋىنە قاتىستى مالىمدەمە جاسادى.
«9-ماۋسىمدا جامبىل وبلىسىنىڭ قورداي اۋداندىق ورتالىق اۋرۋحاناسىنا گۆاردەيسك گارنيزونىنىڭ مەرزىمدى قىزمەتتەگى اسكەري قىزمەتشىسى شۇعىل جاتقىزىلدى. باستاپقىدا ءوزىن ءالسىز سەزىنىپ، قىزۋى كوتەرىلگەن سارباز گۆاردەيسك گارنيزونىنداعى اسكەري گوسپيتالدىڭ جۇقپالى اۋرۋلار بولىمىنە جەتكىزىلگەن بولاتىن. مەديتسينالىق تەكسەرۋلەر مەن زەرتتەۋلەر اسكەري قىزمەتشىدەن ەكىجاقتى پوليسەگمەنتتى پنيەۆمونيا انىقتادى. ناۋقاستىڭ جاعدايى اۋىر دەپ باعالانىپ وتىر. قازىر وعان بارلىق قاجەتتى مەديتسينالىق كومەك كورسەتىلۋدە. سونىمەن بىرگە ول جەردە قورعانىس مينيسترلىگى اسكەري كلينيكالىق گوسپيتالىنىڭ قۇرامىنا انەستەزيولوگ، رەانيماتولوگ جانە تەراپيەۆت دارىگەرلەر كىرەتىن كوشپەلى بريگاداسى جۇمىس ىستەپ جاتىر»، - دەلىنگەن حابارلاما.
اسكەري قىزمەتشى ەمدەۋ مەكەمەسىنە تۇسكەن كەزدە ونىڭ دەنەسىنەن كوگەرگەن نەمەسە زاقىمدانۋ ىزدەرى بولماعانىن اتاپ ءوتۋ كەرەك. مەرزىمدى قىزمەتتەگى ساربازعا قاتىستى كەلىسىمشارت بويىنشا اسكەري قىزمەتشى تاراپىنان بيلىكتى اسىرا پايدالانۋ فاكتىسى بويىنشا ق ر ءى ءى م اسكەري تەرگەۋ باسقارماسى قىلمىستىق ءىس قوزعادى. تەكسەرۋ جۇرگىزىلىپ جاتىر. تەرگەۋ مۇددەسى ءۇشىن باسقا اقپاراتتار جاريا ەتىلمەيدى. ءىس قورعانىس ءمينيسترىنىڭ ەرەكشە باقىلاۋىندا.
ايتا كەتەيىك، پرەزيدەنت ساربازدىڭ كوماعا تۇسۋىنە قاتىستى ءمان- جايدى زەرتتەپ، كىنالى ادامداردى جازالاۋدى تالاپ ەتتى.
جامبىل وبلىسىندا سارباز جانساقتاۋ بولىمىنە تۇسكەن ەدى. وقيعا 9-ماۋسىم كۇنى بولعان. جامبىل وبلىستىق دەنساۋلىق ساقتاۋ باسقارماسى باسپا ءسوز قىزمەتى ساربازدىڭ جاعدايى اۋىر ەكەنىن مالىمدەدى.
«ناۋقاس 9-ماۋسىم كۇنى گۆاردەيسك اسكەري گوسپيتالىنەن جەدەل جاردەم كولىگىمەن جەتكىزىلدى. قورداي ورتالىق اۋداندىق اۋرۋحاناسىنا «پوليسەگمەنتالدى پنيەۆمونيا» دياگنوزىمەن جاتقىزىلدى. وڭ جاقتا پليەۆريت. 3-4 دارەجەلى جۇقپالى توكسيكالىق شوك. سەپسيس. ميدىڭ گيپوكسيالىق ءىسىنۋى، سەرەبرالدى كوما 2-3. دۆس سيندرومى. ناۋقاس كلينيكالىق ءولىمدى باستان كەشكەن. قازىرگى ۋاقىتتا ناۋقاستىڭ جاعدايى وتە اۋىر، كوپتەگەن مۇشەلەر جەتكىلىكسىزدىگى بايقالادى. اتاپ ايتقاندا، تىنىس الۋ، جۇرەك، باۋىر، سەرەبرالدى جانە ينفەكتسيالىق توكسيكالىق شوك بەلگىلەرى بار. گەموفيلتراتسيا جانە ءدارى- دارمەكپەن ەمدەلەدى»، - دەلىنگەن حابارلامادا.
