سارايشىق - ءتول شەجىرەمىزدە ايرىقشا ورنى بار كيەلى شاھار - قاسىم- جومارت توقايەۆ
استانا. KAZINFORM - مەملەكەت باسشىسى قاسىم- جومارت توقايەۆ ۇلتتىق قۇرىلتايدىڭ ءۇشىنشى وتىرىسىندا سويلەگەن سوزىندە وسىلاي دەدى.
«ەڭ الدىمەن، مەن بارشاڭىزعا امال كۇنى قۇتتى بولسىن دەگىم كەلەدى. قىستان امان- ەسەن شىققان تۋعان- تۋىس، اعايىن ءبىر- بىرىمەن قاۋىشىپ جاتىر. ەل اراسىندا امال كۇنى ەلىمىزدىڭ باتىس ايماعىنا ءتان مەرەكە دەگەن تۇسىنىك بار. ءبىراق بۇل قازاقتىڭ كونەدەن كەلە جاتقان ءداستۇرى ەكەنىن ۇمىتپاۋىمىز كەرەك. سوندىقتان ءبىز تۇتاس ەل بولىپ، ناۋرىز مەيرامىن وسى كۇننەن، ياعني امال كۇنىنەن باستاپ تويلاعانىمىز جاراسىمدى بولارى ءسوزسىز،- دەدى پرەزيدەنت.
مەملەكەت باسشىسى سوزىندە بيىل ۇلىستىڭ ۇلى كۇنى قاسيەتتى ورازا ايىنىڭ العاشقى كۇندەرىمەن تۇسپا-تۇس كەلىپ وتىرعانىن اتاپ ءوتتى.
ۇلتتىق قۇرىلتاي دا ءاز ناۋرىز قارساڭىندا ءوتىپ جاتىر. ۇلىستىڭ ۇلى كۇنى تابيعات پەن تۇتاس تىرشىلىك جاڭارادى. ال قۇرىلتايدا قوعامدىق قۇندىلىقتاردى جاڭعىرتۋ ءۇشىن ماڭىزدى قادامدار جاسالادى. جاڭارۋ مەن جاڭعىرۋ جاقسىلىققا جول اشادى. سوندىقتان قۇرىلتاي مۇشەلەرىنىڭ جىلىنا ءبىر رەت القالى جيىندا باس قوسۋى يگى داستۇرگە اينالدى.
«العاشقى وتىرىس ۇلت ۇياسى ۇلىتاۋ جەرىندە وتسە، بىلتىر كيەلى تۇركىستاندا جينالدىق. بۇگىن تاعى ءبىر تاريحي ولكە - اتىراۋ وبلىسىنا كەلىپ وتىرمىز. ءۇشىنشى وتىرىستىڭ جايىق جاعاسىندا ءوتىپ جاتقانى تەگىن ەمەس. ايگىلى سارايشىق قالاسى وسى جەرگە ءتيىپ تۇر. بۇل شاھار ۇلىق ۇلىستىڭ، كەيىن قازاق حاندىعىنىڭ ماڭىزدى اكىمشىلىك جانە ساۋدا ورتالىعى بولعانى تاريحتان بەلگىلى»، - دەدى مەملەكەت باسشىسى.
سونداي- اق پرەزيدەنت «ۇلى جىبەك جولىنىڭ بويىندا تۇرعان قالا ءبىر كەزدەرى ايرىقشا گەوستراتەگيالىق ءرول اتقارعانىن اتاپ ءوتتى.
باتىس پەن شىعىستىڭ ەكونوميكالىق، ساياسي، مادەني قارىم-قاتىناسىنا ەرەكشە ىقپال ەتكەن. اتاقتى حاندارىمىز وسى جەرگە ورداسىن تىگىپ، ەل بيلەگەن. ءبىرقاتارى سارايشىقتا ماڭگىلىك مەكەنىن تاپقان. تاريحشىلاردىڭ پايىمداۋىنشا، قازاق حاندىعىن قۋاتتى مەملەكەتكە اينالدىرعان قاسىم حان وسىندا جەرلەنگەن. ءبىر سوزبەن ايتساق، سارايشىق - ءتول شەجىرەمىزدە ايرىقشا ورنى بار كيەلى شاھار.
«ءبىز ەلدىگىمىزدىڭ نەگىزىن قالاپ، ونى ۇرپاققا تابىستاعان بابالار رۋحىنا تاعزىم ەتەمىز. الايدا، وتكەنىمەن عانا ءومىر سۇرەتىن جۇرت وركەنيەتتى ەل بولا المايدى. ۇلت ساپاسىن جاقسارتامىز دەسەك، ءبىر ەل بولىپ جاڭا قۇندىلىقتار جۇيەسىن قالىپتاستىرۋىمىز قاجەت. قۇرىلتاي - ەشقاشان توي تويلاپ، اڭگىمە- دۇكەن قۇراتىن جيىن بولعان ەمەس، كەلەشەكتە دە ونداي بولمايدى. الدىڭعى ەكى وتىرىستا ەلىمىزدى دامىتۋعا قاتىستى ماڭىزدى باستامالار كوتەرىلدى. ونىڭ ءبىرازى ورىندالدى. جالپى وزگەرىستەر بارلىق سالادا بولىپ جاتىر»، - دەدى پرەزيدەنت.
اۆتور
ايدار وسپاناليەۆ
