ساراپشىلار مەن ۇكىمەت مۇشەلەرى ۋاقىت بەلدەۋى ماسەلەسى بويىنشا ماجىلىسكە شاقىرىلدى
استانا. KAZINFORM - بۇگىن ماجىلىستە وتكەن «AMANAT» پارتياسى فراكسياسىنىڭ جيىنىندا دەپۋتاتتار وڭىرلەردەگى جازعى ساپارلارى كەزىندە سايلاۋشىلار تاراپىنان كوتەرىلگەن ماسەلەلەردى تالقىلادى.
كوپ ايماقتا ءجيى كوتەرىلگەن ماسەلەلەردىڭ قاتارىندا ۋاقىت بەلدەۋىن قايتا قاراۋ تاقىرىبى بولدى. تالقىلاۋ ناتيجەسىندە قوعامدىق اۋقىمدى ۇسىنىستى ەسكەرە وتىرىپ، اتالعان ماسەلەنى مۇددەلى مەملەكەتتىك ورگاندار مەن ساراپشىلار قوعامداستىعى وكىلدەرىنىڭ قاتىسۋىمەن وتەتىن ءماجىلىستىڭ الداعى جالپى وتىرىستارىنىڭ بىرىندە قاراۋ تۋرالى شەشىم قابىلداندى.
ءسوز باسىندا ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ دەپۋتاتتاردىڭ وڭىرلەرگە ساپارى كەزىندە جينالعان حالىقتىڭ بارلىق پروبلەمالىق ماسەلەسى جۇيەلەنىپ، ونى شەشۋ ءۇشىن ۇكىمەتكە جولداناتىنىن اتاپ ءوتتى. بۇل جۇمىستىڭ قورىتىندىسى جىل سوڭىندا ءماجىلىستىڭ جالپى وتىرىستارىنىڭ بىرىندە اشىق قارالادى.
وسى ورايدا، ءبىرقاتار دەپۋتات شىعىس قازاقستان، اقمولا، پاۆلودار، سولتۇستىك قازاقستان، اباي جانە جەتىسۋ وبلىستارىنىڭ تۇرعىندارىن تولعاندىرعان ەڭ وزەكتى ماسەلەلەردىڭ قاتارىندا UTC+5 ۋاقىت فورماتىنا كوشۋ ەكەنىن اتاپ ءوتتى. كەزدەسۋلەر بارىسىندا ازاماتتار دەپۋتاتتارعا ءدال وسى ماسەلەگە بايلانىستى تۋىنداعان قولايسىزدىقتار تۋرالى كوپ دالەل كەلتىردى - ءتۇن ورتاسىندا تاڭ اتادى، ادەتتەگىدەن الدەقايدا ەرتە قاراڭعى تۇسەدى. مۇنىڭ ءبارى ادامداردىڭ كۇندەلىكتى ومىرىنە كەرى اسەر ەتەدى.
بۇعان قوسا، باستاماشىل ازاماتتار توبى وسى ماسەلە بويىنشا ءتيىستى پەتيتسيا جاريالاپ، ول قوعامدا قىزۋ تالقىعا ءتۇستى. جۋىردا وتكەن ءماجىلىستىڭ پلەنارلىق وتىرىسىندا بۇل ماسەلەنى «AMANAT» فراكسياسىنىڭ مۇشەسى، شىعىس قازاقستان وبلىسىنان سايلانعان ءبىرمانداتتى دەپۋتات لۇقبەك تۋماشينوۆ كوتەردى. الايدا، ساۋدا جانە ينتەگراتسيا ءمينيسترىنىڭ بۇل ماسەلە ءۇش جىلدان كەيىن قارالادى دەگەن جاۋابىن حالىق قالاۋلىلارى جەتكىلىكسىز دەپ تانىدى.
اتالعان ماسەلە بويىنشا دەپۋتاتتار لۇقبەك تۋماشينوۆ، رينات زايتوۆ، يۋليا كۋچينسكايا، داۋلەت مۇقايەۆ، نۇرتاي سابيليانوۆ، اسحات ايماعامبەتوۆ، دۇيسەنباي تۇرعانوۆ جانە وزگە دە ازاماتتار پىكىر ءبىلدىردى.
وسى تاقىرىپ توڭىرەگىندەگى قوعامدىق ۇلكەن رەزونانستى ەسكەرە وتىرىپ، تالقىلاۋ ناتيجەسىندە فراكسيا دەپۋتاتتارى مۇددەلى مەملەكەتتىك ورگانداردىڭ، عالىمداردىڭ، ساراپشىلاردىڭ جانە وڭىرلەردەگى وكىلدەردىڭ قاتىسۋىمەن الداعى ۋاقىتتا وتەتىن ءماجىلىستىڭ جالپى وتىرىستارىنىڭ بىرىندە ۋاقىت بەلدەۋىن اۋىستىرۋ ماسەلەسىن اشىق قاراۋ تۋرالى شەشىم قابىلدادى. وتىرىس قورىتىندىسى بويىنشا ناقتى ۇسىنىستار ازىرلەپ، ونى ۇكىمەتكە ۇسىنۋ جوسپارلانۋدا.
