ساراپشى تەڭگە باعامىنىڭ كۇرت قۇلدىراۋىنا نە سەبەپ بولعانىن ءتۇسىندىردى

  استانا. قازاقپارات - 2024 -جىلعى 18-ماۋسىمداعى ساۋدانىڭ قورىتىندىسى بويىنشا دوللار باعامى 458,15 تەڭگە بولدى. بۇل - سوڭعى توعىز ايداعى ەڭ ۇلكەن قۇلدىراۋ.

قازاقستان قارجىگەرلەر قاۋىمداستىعىنىڭ جەتەكشى ساراپشىسى زارينا سكريپچەنكو تەڭگە ءۇشىن سىرتقى جانە ىشكى ىرگەلى فاكتورلار قولايلى بولعانىن ايتادى.

ساراپشى تەڭگە باعامىنىڭ كۇرت قۇلدىراۋىنا نە سەبەپ بولعانىن ءتۇسىندىردى

«سايكەسىنشە، باعامنىڭ السىرەۋى ۇلتتىق نارىقتىڭ كەيبىر قاتىسۋشىلارىنىڭ شەتەل ۆاليۋتاسىن ءىرى كولەمدە ساتىپ الۋىمەن، ۇلتتىق بانكتىڭ مونەتارلىق ساياساتىن جۇمسارتۋ اياسىندا شەتەلدىك جانە قازاقستاندىق ينۆەستورلاردىڭ تەڭگەدەگى اكتيۆتەردەن كەتۋىمەن، سونداي- اق قارجى نارىعىنىڭ جەكەلەگەن كاسىپقوي قاتىسۋشىسىنىڭ شەتەل ۆاليۋتاسىن ساتىپ الۋ بويىنشا ۇسىنىستارىمەن بايلانىستى بولۋى مۇمكىن»، - دەپ ءتۇسىندىردى ز. سكريپچەنكو.

ونىڭ ايتۋىنشا، ۇلتتىق ۆاليۋتاعا قازىرگى ىشكى فاكتورلار قولداۋ كورسەتە الادى. ۇلتتىق ستاتيستيكا بيۋروسىنىڭ مالىمەتىنشە، 2024 -جىلعى قاڭتار- ساۋىردە يمپورتتىڭ قىسقارۋ قارقىنىنىڭ (%7,8) ەكسپورتتىڭ تومەندەۋىنەن (%0,5) اسۋى ەسەبىنەن ساۋدا بالانسىنىڭ كەڭەيۋ ءۇردىسى (%21,3) ساقتالىپ وتىر.

ۇلتتىق بانكتىڭ مالىمەتىنشە، وسى توقساندا سىرتقى قارىزدى وتەۋ/قىزمەت كورسەتۋ بويىنشا تولەمدەر $6,5 ميلليارد، بۇل وتكەن كەزەڭدەگى تولەمدەردەن %19,4 عا تومەن. تيىسىنشە، ۇلتتىق ۆاليۋتانىڭ ودان ءارى قۇنسىزدانۋ الەۋەتى قازاقستاننىڭ ساۋدا بالانسى پروفيتسيتىنىڭ ۇلعايۋىن، سىرتقى بورىشتى وتەۋ جانە وعان قىزمەت كورسەتۋ بويىنشا تولەمدەردىڭ قالىپتى كولەمدەرىن، سونداي-اق ۇلتتىق بانكتىڭ وپەراتسيالارى شەڭبەرىندەگى تازا ساتۋ كولەمىنىڭ ۇلعايۋىن شەكتەۋى مۇمكىن.

«قازاتومونەركاسىپتىڭ» اكسيالارى ۇلتتىق قور قاراجاتىن ينۆەستيتسيالاۋعا رۇقسات ەتىلگەن قارجى قۇرالدارىنىڭ تىزىمىنە ەنگىزىلگەن، بۇل دا ىشكى نارىقتا شەتەل ۆاليۋتاسىنىڭ ۇسىنىسىن ارتتىرۋعا سەپتىگىن تيگىزەدى، دەپ سانايدى ساراپشى.