ساراپشى پرەزيدەنت جولداۋى تۋرالى: وتاندىق بيزنەسكە تۇراقتى «ويىن ەرەجەسى» كەرەك
استانا. قازاقپارات - مەملەكەت باسشىسىنىڭ بيىلعى جولداۋىندا بيزنەسكە تۇسەتىن اكىمشىلىك- سالىقتىق جۇكتەمە، ءوندىرىستى ۇزاق مەرزىممەن قارجىلاندىرۋ جانە وتاندىق كاسىپورىنداردىڭ ءىرى جوبالارعا قاتىسۋى سياقتى ماسەلەلەرگە ەرەكشە نازار اۋدارىلدى.
ونەركاسىپ ساياساتى جانە يمپورتتى الماستىرۋ جونىندەگى ساراپشى ينديرا نۇرلاننىڭ پىكىرىنشە، بۇل باعىتتارداعى ناتيجەگە قول جەتكىزۋ ءۇشىن كاسىپكەرلەرگە بولجامدى ءارى تۇراقتى «ويىن ەرەجەسى» قاجەت.
- كاسىپكەرلەرگە جاعدايدىڭ تۇراقتى بولعانى ماڭىزدى. پرەزيدەنت سالىق زاڭناماسىنداعى بيزنەسكە ارتىق جۇكتەمە تۋدىراتىن نورمالاردى تۇزەتۋ قاجەتتىگىن اتاپ ءوتتى. كاسىپورىندار جابدىق ساتىپ الۋ، ءوندىرىستى كەڭەيتۋ نەمەسە قىزمەتكەرلەردى جالداۋ سياقتى شەشىمدەردى الدىن الا جوسپارلايدى. سوندىقتان ەرەجەلەردىڭ بولجامدى بولۋىنىڭ ءمانى زور، - دەدى ينديرا نۇرلان.
ساراپشىنىڭ ايتۋىنشا، وندىرىستىك جوبالاردىڭ ناتيجەسى بىردەن كورىنبەيدى: جاڭا قۋاتتاردى ىسكە قوسۋعا جانە سالىنعان قاراجاتتىڭ قايتارىمىن الۋعا ۋاقىت قاجەت. وسى سەبەپتى ۇزاقمەرزىمدى قارجىلاندىرۋعا قولجەتىمدىلىك پەن بانكتەردىڭ ناقتى سەكتوردى كرەديتتەۋى ونەركاسىپتىڭ دامۋىنا ىقپال ەتەتىن ماڭىزدى فاكتورلاردىڭ ءبىرى.
- ءوندىرىس جوبالارى ىسكە قوسىلىپ، ءوزىن-ءوزى اقتاۋ ءۇشىن ۋاقىت كەرەك. قارجىلاندىرۋ شارتتارى وسى ەرەكشەلىكتى ەسكەرۋگە ءتيىس، - دەيدى ول.
ينديرا نۇرلان ءىرى كومپانيالاردىڭ ساتىپ الۋ كونكۋرستارىنا وتاندىق وندىرۋشىلەردىڭ قاتىسۋ مۇمكىندىگىن كەڭەيتۋ جەرگىلىكتى كاسىپورىندارعا تاپسىرىستارىن جوسپارلاپ، ءوندىرىس جۇكتەمەسىن تۇراقتاندىرۋعا جانە نارىقتاعى ورنىن نىعايتۋعا جول اشاتىنىن ايتادى.
ساراپشى جاڭا زاۋىت سالۋ تۋرالى شەشىم قابىلدانار الدىندا ىشكى نارىقتاعى قاجەتتىلىك پەن ەكسپورتتىق مۇمكىندىكتەردى تالداۋ كەرەكتىگىن ايتتى.
- جاڭا زاۋىتتاردىڭ ونىمدەرى سۇرانىسقا يە بولا ما دەگەن سۇراققا ناقتى جاۋاپ قاجەت. سۇرانىس، نارىق جانە ەكسپورت مۇمكىندىكتەرى قۇرىلىس باستالعانعا دەيىن باعالانۋ كەرەك. كاسىپورىننىڭ ومىرشەڭدىگى وسىعان بايلانىستى، - دەدى ول.
ساراپشى جولداۋدا ءسوز بولعان ينفراقۇرىلىمدى جاڭارتۋ باستاماسى دا وتاندىق كومپانيالارعا قوسىمشا مۇمكىندىك اشاتىنىن ايتىپ وتىر. مۇنداي جوبالار ماتەريالدار مەن جابدىقتارعا، قىزمەتتەرگە سۇرانىس تۋدىرىپ، جەرگىلىكتى كاسىپورىنداردىڭ وندىرىستىك تىزبەكتەرگە قوسىلۋىنا جول اشادى.
جولداۋدا كورىنىس تاپقان سيفرلاندىرۋ ماسەلەسىنە توقتالعان ينديرا نۇرلان ونىڭ تيىمدىلىگىن ەنگىزىلگەن تەحنولوگيالاردىڭ سانىمەن عانا ەمەس، ءوندىرىس ناتيجەسىمەن باعالاۋ كەرەك دەپ سانايدى.
ونىڭ ايتۋىنشا، سيفرلىق شەشىمدەر كاسىپورىن جۇمىسىنىڭ ۇزدىكسىزدىگىن قامتاماسىز ەتىپ، شىعىندى ازايتۋعا جانە ءونىم ساپاسىن ارتتىرۋعا ىقپال ەتۋ كەرەك.
ساراپشىنىڭ پىكىرىنشە، جولداۋدا ايتىلعان باستامالاردىڭ ناقتى ناتيجەسى ولاردىڭ ورىندالۋ بارىسىنا بايلانىستى بولماق.
