ساقتاندىرۋ مەن باعالى قاعازدار نارىعىن رەتتەيتىن جاڭا زاڭدار ازىرلەنەدى - ۇلتتىق بانك
استانا. KAZINFORM - ساقتاندىرۋ مەن باعالى قاعازدار نارىعىن رەتتەيتىن جاڭا زاڭدار ازىرلەنەدى. بۇل تۋرالى ۇلتتىق بانكتەن ءمالىم ەتتى.
- مەملەكەت باسشىسىنىڭ تاپسىرمالارىن ورىنداۋ اياسىندا ۋاكىلەتتى ورگان قارجى نارىعىن رەتتەۋ جانە دامىتۋ اگەنتتىگىمەن بىرلەسىپ، بيىل 1-قىركۇيەككە دەيىن ساقتاندىرۋدىڭ جانە قور نارىعىن دامىتۋدىڭ 2030 -جىلعا دەيىنگى باعدارلامالارىن ازىرلەۋدى جوسپارلاپ وتىر. بۇل باعدارلامالار ساقتاندىرۋ سەكتورى مەن باعالى قاعازدار نارىعىنىڭ ەل ەكونوميكاسىنا قوساتىن ۇلەسىن ەسەلەۋگە باعىتتالادى. قازىر وسى قۇجاتتاردىڭ نەگىزگى كونتسەپتۋالدىق باعىتتارى پىسىقتالىپ جاتىر، - دەدى ورتالىق بانك اگەنتتىكتىڭ رەسمي ساۋالىنا وراي.
ۇلتتىق بانك الداعى ۋاقىتتا حالىقارالىق وزىق تاجىريبە مەن قازىرگى سىن-قاتەرلەردى ەسكەرە وتىرىپ ساقتاندىرۋ مەن باعالى قاعازدار نارىعىن رەتتەيتىن جاڭا زاڭدار ازىرلەنەتىنىن اتاپ وتەدى.
- بۇل - باعدارلامالاردى ءتيىمدى ىسكە اسىرۋدىڭ العىشارتى. وسى باستامانىڭ بارلىعىن قارجى نارىعىنا قاتىسۋشىلارمەن جانە حالىقارالىق ساراپشىلارمەن بىرلەسىپ ىسكە اسىرامىز، - دەدى قارجى رەتتەۋشىسى.
وسى جىلدىڭ اقپانىندا وتكەن ۇكىمەت وتىرىسىندا مەملەكەت باسشىسى قاسىم-جومارت توقايەۆ قارجى نارىعىن رەتتەۋ جانە دامىتۋ اگەنتتىگى مەن ۇلتتىق بانككە 1-قىركۇيەككە دەيىن ساقتاندىرۋ جانە قور نارىعىن دامىتۋدىڭ 2030 -جىلعا دەيىنگى باعدارلاماسىن ازىرلەۋدى تاپسىرعان ەدى.
