ساق ستيلى: نومينالى 2000 تەڭگەلىك جاڭا سەريالى بانكنوتالار اينالىمعا شىعادى
استانا. KAZINFORM - قازاقستان ۇلتتىق بانكى 2024-جىلعى 25-جەلتوقساندا 2024-جىلعى ۇلگىدەگى جاڭا ديزاينمەن نومينالى 2000 تەڭگەلىك بانكنوتالاردى اينالىمعا شىعارادى. بۇل تۋرالى بانكتىڭ باسپا ءسوز قىزمەتى ءمالىم ەتتى.
بۇل «ساق ستيلى» جاڭا سەرياسىنان ۇشىنشى بانكنوتا. ول قازاقى ويۋ-ورنەكتىڭ باستاۋ نەگىزى سانالاتىن جانە كوشپەندىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيتىن «ساق ستيلى» ەلەمەنتتەرىنە نەگىزدەلگەن.
بانكنوتالار جاپپاي قولدانىسقا 2025-جىلدىڭ ەكىنشى توقسانىندا بەرىلە باستايدى. سەبەبى ولاردى ەلىمىزدىڭ بارلىق ايماعىنا جەتكىزۋ ءۇشىن جانە جابدىقتاردى (بانكوماتتار، تەرمينالدار جانە باسقا دا كاسسالىق تەحنيكالار) بەيىمدەۋ ءۇشىن قوسىمشا ۋاقىت قاجەت.
اقشا بەلگىسىنىڭ ديزاينى مەن فورماسى تۋرالى
بانكنوتالاردىڭ ءتۇسى - جاسىل.
بانكنوتانىڭ بەت جاعىندا:
- كوكتە قالىقتاپ ۇشقان قۇسپەن «ءومىر اعاشىنىڭ» بۇتاعى (ەسىك قورعانى، ب. د. د. 5-4 ع ع.، التىن ادام باس كيىمىنىڭ ءبىر بولىگى، تابيعات پەن نانىم بايلانىسىنىڭ قاسيەتتى ماعىناسى)؛
- د ن ق سپيرالىن جانە ادامنىڭ تابيعاتپەن بايلانىسىن بىلدىرەتىن ويۋ-ورنەكپەن ستيلدەندىرىلگەن شەكسىزدىك سيمۆولى؛
- ارتەفاكت - مولشىلىق پەن بايلىقتىڭ سيمۆولى رەتىندە ءمۇيىزدى جانۋاردىڭ بەينەسى (قىزىلتوعان قورعانى، ب. ز. د. 7-6 ع ع.، جەتىسۋ).
ارتقى جاعىندا
- ويۋ-ورنەكپەن بەزەندىرىلگەن قالقاننىڭ فونىندا اقبوكەندەر؛
- «قالقاندى» بەينەلەيتىن دوڭگەلەك قازاق ويۋ-ورنەگى - قۇندىلىقتاردى قورعاۋدىڭ سيمۆولى، ەجەلگى سيمۆول - الەمنىڭ ءتورت قىرى، ورتالىقتاعى كۇن بەلگىسى جاسامپاز ەنەرگيا مەن ءومىردىڭ سيمۆولى رەتىندە.
سونداي-اق، بانكنوتانىڭ سىرت جاعىندا ارتەفاكت - اقبوكەننىڭ باسى بەينەلەنگەن (4-قورعان، ب. د. د. 7 ع ع.، قازاقستان، تورعاي وبلىسى قوستاناي ۋەزىنىڭ دانبار بولىسىنان تابىلدى). بانكنوتانىڭ ورتاسىندا فون رەتىندە قازاق ويۋ-ورنەگىندەگى «شەكسىزدىك» كونتۋرى بار، ونىڭ ىشىندە بۋراباي كولىنىڭ بەينەسى بەينەلەنگەن.
بانكنوتالاردى ايىرباستاۋ جانە اينالىمدا قاتار ءجۇرۋ كەزەڭىن بەلگىلەۋ ءتارتىبى تۋرالى
نومينالى 2000 تەڭگەلىك جاڭا بانكنوتالار 2024-جىلعى 25-جەلتوقساننان باستاپ اينالىمعا ەنەدى جانە 18 اي بويى اينالىستاعى 2012-جىلعى ۇلگىدەگى 2000 تەڭگەلىك ۇلتتىق ۆاليۋتا بانكنوتالارىمەن (بۇدان ءارى - ەسكى ۇلگىدەگى بانكنوتا) اۋىستىرىلادى.
ياعني، ەسكى ۇلگىدەگى بارلىق بانكنوتا ءبىر جارىم جىلدىڭ ىشىندە اينالىمنان بىرتىندەپ الىنادى. تيىسىنشە، بانكنوتالار اينالىمدا قاتار جۇرگەن ۋاقىتتا حالىققا ەسكى ۇلگىدەگى بانكنوتالاردى ەكىنشى دەڭگەيلى بانكتەردەگى نەمەسە قۇب فيليالدارىنداعى جاڭا بانكنوتالارعا ايىرباستاۋدىڭ قاجەتى جوق.
جاڭا جانە ەسكى ۇلگىدەگى بانكنوتالاردىڭ اينالىمدا قاتار ءجۇرۋ كەزەڭى 2025-جىلدىڭ 25-جەلتوقساننان 2026-جىلدىڭ 24-ماۋسىمىنا دەيىنگى ارالىقتى قامتيدى.
ول كەزەڭ اياقتالعاننان كەيىن، ياعني 2026-جىلعى 24-ماۋسىمنان باستاپ بارلىق بانك پەن قازپوشتادا ەسكى ۇلگىدەگى بانكنوتالاردى 3 جىل ىشىندە، ياعني 2029-جىلعى 25-ماۋسىمعا دەيىن جاڭا ۇلگىدەگى بانكنوتالارعا ايىرباستاۋعا مۇمكىندىك بار. ال قۇب فيليالدارىندا مەرزىمسىز ايىرباستاۋعا بولادى.
جاڭا ۇلگىدەگى (2024-جىلعى) جانە ەسكى ۇلگىدەگى (2012-جىلعى) بانكنوتالار اينالىمدا قاتار جۇرەتىن كەزەڭدە زاڭدى تولەم قۇرالى بولىپ سانالادى. تولەمدەر مەن اۋدارىمداردىڭ بارلىق ءتۇرىن جۇزەگە اسىرۋ ءۇشىن، بانك شوتتارىنا اۋدارۋ ءۇشىن قازاقستان رەسپۋبليكاسىنىڭ بۇكىل اۋماعىندا ولاردى اتاۋلى قۇنىنا قاراي قابىلداۋعا مىندەتتى ەكەنىن اتاپ وتەمىز.
ولار ەلىمىزدەگى قۇب، قازپوشتا جانە ەكىنشى دەڭگەيلى بانكتەردىڭ بارلىق فيليالىندا، سونداي-اق قازاقستانداعى بەيرەزيدەنت بانكتەردىڭ فيليالدارىندا شەكتەۋسىز ايىرباستالادى جانە اۋىستىرىلادى.
زاڭدى تولەم قۇرالىنا جاتاتىن بانكنوتالار مەن مونەتالاردى قابىلداۋدان باس تارتۋ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس اكىمشىلىك قۇقىق بۇزۋشىلىق بولىپ سانالاتىنىن ەسكە سالامىز.
ەسكە سالا كەتەيىك، بۇعان دەيىن ۇلتتىق بانك «ساق ستيلى» جاڭا سەرياسىنان نومينالى 10000 تەڭگەلىك بانكنوتالاردى اينالىمعا شىعارعانىن جازعان ەدىك.
