سامات ءابىش بوستاندىقتا، ءبىراق ەشقايدا كەتپەۋ تۋرالى بۇلتارتپاۋ شاراسى كۇشىندە - باس پروكۋراتۋرا

ءماجىلىستىڭ جالپى وتىرىسىنان كەيىن باق وكىلدەرى باس پروكۋروردىڭ ورىنباسارى جاندوس ومىراليەۆتەن ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ورىنباسارى سامات ابىشكە قاتىستى قانداي بۇلتارتپاۋ شاراسى تاعايىندالعانىن سۇرادى، دەپ حابارلايدى Kazinform.

«قىلمىستىق ءىس بويىنشا بۇلتارتپاۋ شاراسى وزگەرتىلگەن جوق. ول ەشقايدا كەتپەۋ جونىندەگى بۇلتارتپاۋ شاراسى ءوز كۇشىندە. ەشقانداي بۇلتارۋ نەمەسە جاۋاپ بەرۋگە كەلمەۋ سياقتى فاكتىلەرى بولماعان سەبەپتى بۇلتارتپاۋ شاراسى وزگەرتىلگەن جوق»، - دەدى ول.

سونداي-اق جاندوس ومىراليەۆ اتالعان تۇلعانىڭ قانداي باپ بويىنشا تەرگەلىپ جاتقانىن ناقتىلادى.

«ول لاۋازىمدى وكىلەتتىگىن اسىرا پايدالانۋ بويىنشا قىلمىستىق ءىس قوزعالىپ، سول باپ بويىنشا تەرگەلىپ جاتىر. ول تەرگەۋ بارىسىندا»، - دەدى باس پروكۋروردىڭ ورىنباسارى.

«كەتىپ قالا ما دەپ ويلامايسىز با؟»، - دەپ سۇرادى جۋرناليست.

«وعان ەشقانداي نەگىز جوق»، - دەدى جاندوس ومىراليەۆ.