سالىق ەسەبىن ۋاقىتىندا تاپسىرماسا نە بولادى
استانا. KAZINFORM - بيىل 1-قاڭتاردان باستاپ قازاقستاندا سالىق ەسەپتىلىگىن ۇسىنۋدىڭ جاڭا ءتارتىبى قولدانىلادى.
سالىق كودەكسىنىڭ نورمالارىنا سايكەس، بەلگىلەنگەن تاپسىرۋ مەرزىمى وتكەننەن كەيىن سالىق ورگانىنىڭ اقپاراتتىق جۇيەسى ءتيىستى سالىق كەزەڭى ءۇشىن نولدىك كورسەتكىشتەرى بار ەسەپتىلىكتى اۆتوماتتى تۇردە قالىپتاستىرادى، دەپ حابارلايدى استانا بويىنشا مەملەكەتتىك كىرىستەر دەپارتامەنتى.
وسىعان بايلانىستى، سالىق تولەۋشىلەر «سالىق تولەۋشىنىڭ كابينەتى» ۆەب-قوسىمشاسىندا ۇسىنىلۋعا ءتيىس سالىق ەسەپتىلىگى نىساندارىن (س ە ن) الدىن الا بەلگىلەۋى قاجەت.
ءىس-قيمىل الگوريتمى:
- «سالىق تولەۋشىنىڭ كابينەتى» (س ءا ي ج) ۆەب-قوسىمشاسىنا كىرۋ؛
- «ۇسىنىلاتىن س ە ن» بولىمىنە ءوتۋ؛
- قولدانىلاتىن سالىق رەجيمى مەن قىزمەت تۇرىنە سايكەس قاجەتتى سالىق ەسەپتىلىگى نىساندارىن قوسۋ؛
- ءاربىر سەن بويىنشا تاپسىرۋ باستالعان «جىل مەن سالىق كەزەڭىن» كورسەتۋ؛
- ەنگىزىلگەن مالىمەتتەردى ساقتاۋ.
- بۇل رەتتە نولدىك كورسەتكىشتەرى بار ەسەپتىلىكتىڭ اۆتوماتتى تۇردە قالىپتاسۋى سالىق تولەۋشىنى ءىس جۇزىندەگى سالىق مىندەتتەمەلەرىن كورسەتۋ مىندەتىنەن بوساتپايدى. ەگەر ەسەپتىلىك اۆتوماتتى تۇردە قالىپتاسقاننان كەيىن سالىق تولەۋشىدە ەسەپتىلىكتە كورسەتىلۋگە ءتيىس سالىق سالۋ وبەكتىلەرى ناقتى تىركەلگەن بولسا، ول ءتيىستى سالىق كەزەڭى ءۇشىن قوسىمشا سالىق ەسەپتىلىگىن تاپسىرۋعا مىندەتتى، - دەپ ءتۇسىندىردى مەملەكەتتىك كىرىستەر دەپارتامەنتى.
اتالعان ءتارتىپ جەكە تۇلعالاردىڭ جەكە كاسىپكەرلىككە قاتىسى جوق قىزمەتى بويىنشا سالىق ەسەپتىلىگىن ۇسىنۋىنا قولدانىلمايدى.
وسىلايشا، ەسەپتىلىكتى نولدىك كورسەتكىشتەرمەن اۆتوماتتى تۇردە قالىپتاستىرۋ سالىقتىق اكىمشىلەندىرۋدى جەڭىلدەتۋگە جانە سالىق تولەۋشىلەرگە تۇسەتىن اكىمشىلىك جۇكتەمەنى ازايتۋعا باعىتتالعان.
ايتا كەتەيىك، بيىل 1-قاڭتاردان باستاپ قازاقستاندا جاڭا سالىق كودەكسى كۇشىنە ەنىپ، ارنايى سالىق رەجيمدەرىنىڭ سانى قىسقارىپ، ولاردى قولدانۋ ءتارتىبى وزگەردى.
