«سالتانات زاڭى» نەمەسە وزبەكستاندىقتار بيشىمبايەۆ ىسىنە قاتىستى قانداي پىكىردە

 تاشكەنت. KAZINFORM - ەكس- مينيستر قۋاندىق بيشىمبايەۆتىڭ سوتى تەك قازاقستاندىقتاردىڭ اراسىندا ەمەس، سونىمەن قاتار شەتەلدىكتەر ءۇشىن دە قوعامدىق رەزونانس تۋدىردى.

بۇل سوت وتىرىسىن كورشىلەس ەل ازاماتتارى ءجىتى باقىلاپ وتىر. ونىڭ ىشىندە بۇل وقيعاعا بەي- جاي قارامايتىن وزبەكستاندىقتاردىڭ قاتارى قالىڭ، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

كورشىلەس مەملەكەت تۇرعىندارىنىڭ پىكىرىنشە، بۇل وقيعا ماسەلەنىڭ سالدارىمەن ەمەس، سەبەبىمەن كۇرەسكە تۇرتكى بولۋى ءتيىس. بۇل رەتتە سوت پروتسەسى ءجۇرىپ جاتقان وقيعاعا قاتىستى بەلگىلى وزبەكستاندىق كاسىپكەر، تانىمال بلوگەر ديارا ۋسمانوۆا پىكىر ءبىلدىردى. ول ءوزىنىڭ الەۋمەتتىك جەلىدەگى رەسمي پاراقشاسىندا سالتانات نۇكەنوۆامەن بولعان جاعداي كوپتەگەن كەلىنشەكتىڭ قازىرگى ومىرىندە كەزدەسەتىن شىندىق ەكەنىن جازدى.

«قازاقستاندا بولعان سۇلۋ قىز - سالتاناتتىڭ (نۇكەنوۆا - اۆت.) وقيعاسى بۇگىنگى تاڭدا كوپتەگەن ايەلدىڭ ومىرىندە بولىپ جاتقان شىندىق ەكەنىن ەلەستەتۋ قورقىنىشتى. ولار ازىرگە ولگەن جوق. سوندىقتان ولاردىڭ ءۇنى شىقپايدى، شىدايدى، كەتىپ قالعىسى كەلگەنمەن، قورقادى. مەن مۇنداي ايەلدەردى تۇسىنەمىن، ويتكەنى ءبىر كەزدەرى وسىنداي جاعداي ءوز باسىمنان دا وتكەن»، - دەپ جازدى ديارا ۋسمانوۆا Instagram پاراقشاسىندا.

ونىڭ پايىمىنشا، مۇنداي جاعدايلاردىڭ الدىن الۋ ءۇشىن ءار ادامعا الدىمەن قۇقىقتىق ساۋاتتىلىق قاجەت.

«وسىلايشا ءبىز ايەلدىڭ جەكە دارا تۇلعا بولىپ قالىپتاسۋى، قۇقىقتىق ساۋاتتىلىعى جانە قارجىلىق تاۋەلسىزدىگى دەگەن ويعا قايتا ورالامىز. بۇل باعىتتار ءارقاشان باسىمدىققا يە بولۋى ءتيىس»، - دەپ تۇيىندەيدى ديارا ۋسمانوۆا ءوز جازباسىن.

بۇلارمەن قاتار، وزبەكستانداعى بۇقارالىق اقپارات قۇرالدارىندا دا بيشىمبايەۆتىڭ ىسىنە قاتىستى ماقالالار ءجيى جاريالانىپ تۇرادى. وعان قىتىستى كورشىلەس ەل تۇرعىندارى سوتتىڭ اشىق ءوتۋى مەن دەرەكتەردىڭ زەردەلەنۋىن جوعارى باعالاپ، پىكىر قالدىرىپ جاتىر. وسى رەتتە وزبەكستاندىقتار تۇرمىستىق زورلىق-زومبىلىقتىڭ الدىن الۋ ءۇشىن الدىمەن زاڭنامالىق بازانى قاتاڭداتۋ كەرەك دەپ ەسەپتەيدى.

سونداي- اق، تاياۋدا قازاقستاندا قابىلدانعان ايەل قۇقىعى مەن بالالاردىڭ قاۋىپسىزدىگىن قامتاماسىز ەتۋگە باعىتتالعان زاڭ وزبەكستان تۇرعىندارىنىڭ اراسىندا قىزۋ تالقىعا ءتۇستى. بۇل قۇجاتتى وزبەكستاندىق ب ا ق «سالتانات زاڭى» دەگەن اتاۋمەن جاريالادى.

ارتىنشا وزبەكستان ۇكىمەتى دە تۇرمىستىق زورلىق- زومبىلىق قۇرباندارىنا كومەك كورسەتۋ مەحانيزىمىن وزگەرتۋگە كىرىستى. اتاپ ايتقاندا، ەل پرەزيدەنتى شاۆكات ميرزيەيەۆتىڭ تاپسىرماسىنا ساي، ەندى تۇرمىستىق «تيرانداردان» زارداپ شەككەندەرگە ءۇش دەڭگەيلى قولداۋ كورسەتىلەدى.

ونىڭ العاشقىسى - ماحالليا دەڭگەيىندەگى كومەك. وندا الەۋمەتتىك قىزمەتكەر، پروفيلاكتيكا ينسپەكتورى جانە ايەلدەر بەلسەندىسى تۇرمىستاعى قىسىم كورسەتۋ فاكتىلەرىن زەرتتەپ، جاعدايدى ۇنەمى قاداعالاپ وتىرادى.

ودان كەيىن اۋدان دەڭگەيىندە «ينسون» ورتالىقتارىندا قورعاۋ وردەرىن تالاپ ەتپەستەن پسيحولوگيالىق، قۇقىقتىق جانە الەۋمەتتىك قىزمەتتەر ۇسىنىلادى. اۋرۋحانالاردىڭ جەدەل جاردەم بولىمشەلەرىندە قۇرباندارعا ارنالعان العاشقى جاردەم بولمەلەرى ۇيىمداستىرىلادى.

سونداي- اق، ءۇشىنشى دەڭگەي -وبلىستىق دارەجەدە بولادى. وندا ايەلدەردى وڭالتۋ ورتالىقتارىنا ءوتىنىشسىز 6 ايعا دەيىنگى مەرزىمگە ورنالاستىرىپ، پسيحولوگيالىق جانە زاڭ قىزمەتتەرى كورسەتىلەدى.

قوسا كەتسەك، بيىل تۇرمىستىق زورلىق-زومبىلىق جاساعان 4,5 مىڭعا جۋىق وزبەكستاندىق جاۋاپقا تارتىلدى.