سالماعى 25 توننادان اساتىن جۇك كولىكتەرىنە ارنايى ءنومىر ەنگىزىلۋى مۇمكىن
استانا. KAZINFORM - قازاقستاندا شامادان تىس اۋىر جۇك كولىكتەرىنىڭ جالپىعا ورتاق اۆتوجولدارمەن ءجۇرۋىن شەكتەۋگە باعىتتالعان ءبىرقاتار ۇسىنىس قاراستىرىلىپ جاتىر.
بۇل تۋرالى «قازاۆتوجول» باسقارما ءتوراعاسى دارحان يماناشيەۆ ايتتى.
ونىڭ سوزىنشە، بەلگىلەنگەن مولشەردەن اۋىر كولىكتەر جول جابىنىنا ايتارلىقتاي زاقىم كەلتىرەدى. قازاقستان جولدارىندا سالماعى 200 توننادان اساتىن جۇك كولىكتەرىنىڭ جۇرگەنى دە انىقتالعان.
«سالماعى شامامەن 204 توننا بولاتىن كولىكتىڭ جولعا شىققان دەرەگى بار. مۇنداي سالماقتى ەشبىر جول جابىنى كوتەرە المايدى. سالىستىرۋ ءۇشىن ايتساق، بۇل ءۇش جارىم تەمىرجول ۆاگونىنىڭ سالماعىنا تەڭ»، - دەدى دارحان يماناشيەۆ.
قانداي شارالار ۇسىنىلدى؟
پرەمەر-ءمينيستردىڭ وكىمىمەن اۆتوجول سالاسىن رەفورمالاۋ جونىندەگى ارنايى جۇمىس توبى قۇرىلعان. توپ جول ينفراقۇرىلىمىنا قاتىستى ماسەلەلەرمەن قاتار، اۋىر جۇك كولىكتەرىنىڭ قوزعالىسىن رەتتەۋ جولدارىن دا قاراستىرادى.
ۇسىنىلعان شارالار قاتارىندا:
شامادان تىس اۋىر كولىكتەردىڭ جالپىعا ورتاق جولدارعا شىعۋىنا تىيىم سالۋ؛
سالماعى 25 توننادان اساتىن جۇك كولىكتەرىنە وزگە تۇستەگى مەملەكەتتىك ءنومىر بەرۋ؛
كولىكتىك باقىلاۋدىڭ كەيبىر وكىلەتتىكتەرىن پوليتسياعا تاپسىرۋ بار.
ارنايى تۇستەگى ءنومىر اۋىر جۇك كولىكتەرىن جولدا بىردەن انىقتاپ، ولاردىڭ قوزعالىسىن تىركەۋگە مۇمكىندىك بەرەدى. ال ىشكى ىستەر مينيسترلىگى مۇنداي كولىكتەردىڭ ساقتاندىرىلۋىن جانە جولعا شىعۋ تالاپتارىن ساقتاۋىن باقىلاۋى مۇمكىن.
قازىرگى ۋاقىتتا اتالعان ۇسىنىستاردى ىسكە اسىرۋ جوسپارى ازىرلەنگەن. ونى قاراشانىڭ سوڭىنا دەيىن كەلىسىپ، كەيىن ءتيىستى جۇمىستاردى باستاۋ جوسپارلانىپ وتىر.
