ساكەن بيبوسىنوۆ 10 جىلدان كەيىن عانا پاتەرىن ءوز اتىنا اۋدارا الادى - اكىمدىك
تۇركىستان وبلىسىنىڭ اكىمدىگى بوكستان توكيو وليمپياداسىنىڭ قولا جۇلدەگەرى، الەم چەمپيونى ساكەن بيبوسىنوۆقا بەرىلگەن پاتەرگە قاتىستى پىكىر ءبىلدىردى، دەپ حابارلايدى Kazinform.
الەۋمەتتىك جەلى بەلسەندىلەرى سپورتشىعا تابىستالعان پاتەردىڭ ارەندالىق ەكەنىن ايتىپ، جەلىدە قىزۋ تالقىلاپ جاتىر. بۇل تۋرالى ءبىز دە ارنايى اقپارات بەرگەن بولاتىنبىز.
ال، بۇگىن تۇركىستان وبلىسى اكىمدىگىنىڭ باسپا ءسوز قىزمەتى بوكسشى ساكەن بيبوسىنوۆقا 2 بولمەلى ارەندالىق پاتەر بەرىلگەنىن، ول پاتەردى تەك 10 جىلدان سوڭ عانا ءوز اتىنا اۋدارا الاتىنىن ايتتى.
«جاڭا باسپانا وليمپيادا چەمپيوندارى مەن جۇلدەگەرلەرىنە تۇرعىنجاي بەرۋ جانە ونى پايدالانۋ قاعيدالارى نەگىزىندە كوممۋنالدىق تۇرعىنجاي قورى-تۇرعىنجايلاردى پايدالانۋعا بەرۋ جونىندەگى ارنايى مەملەكەتتىك مەكەمەگە بەكىتىلگەن، جەرگىلىكتى اتقارۋشى ورگانداردىڭ قاراۋىنداعى تۇرعىن ۇيدەن بەرىلگەن.
كورسەتىلەتىن قىزمەتتى الۋشىعا مىناداي شارتتار بەلگىلەنەدى:
1) وليمپيادالىق، پاراليمپيادالىق جانە سۋردليمپيادالىق ويىنداردا التىن مەدال جەڭىپ العان چەمپيونعا-ءۇش بولمەلى پاتەر؛
2) وليمپيادالىق، پاراليمپيادالىق جانە سۋردليمپيادالىق ويىنداردا كۇمىس مەدال جەڭىپ العان جۇلدەگەرگە-ەكى بولمەلى پاتەر؛
3) وليمپيادالىق، پاراليمپيادالىق جانە سۋردليمپيادالىق ويىنداردا قولا مەدال جەڭىپ العان جۇلدەگەرگە-ءبىر بولمەلى پاتەر.
قۇجاتقا سايكەس، كورسەتىلەتىن قىزمەتتى الۋشىمەن شارت 10 جىل مەرزىمگە جاسالادى. شارت جاساسقان كۇننەن باستاپ 10 جىل وتكەن سوڭ كورسەتىلەتىن قىزمەتتى الۋشىلار كوممۋنالدىق تۇرعىن ءۇي قورىنان بەرىلگەن، وزدەرى تۇرىپ جاتقان تۇرعىنجايدى وتەۋسىز نەگىزدە مەنشىككە الادى»،-دەلىنگەن اكىمدىك تاراپىنان بەرىلگەن اقپاراتتا.
ال، سپورتشى دوپينگتى قولدانعان نەمەسە پايدالانۋعا ارەكەت جاساعان جاعدايدا سپورتتىق ناتيجە جويىلعاندا، كورسەتىلەتىن قىزمەتتى الۋشىمەن اتالعان قاعيدالاردىڭ 19-تارماعىنا سايكەس 10 جىلعا جاسالعان شارت بۇزىلادى.
كورسەتىلەتىن قىزمەتتى بەرۋشى دۇنيەجۇزىلىك دوپينگكە قارسى ۇيىمنىڭ، حالىقارالىق وليمپيادا كوميتەتىنىڭ، حالىقارالىق پاراليمپيادا كوميتەتىنىڭ، ساڭىراۋلاردىڭ حالىقارالىق سپورت كوميتەتىنىڭ جارىس حاتتاماسىن جانە سپورتتىق ناتيجەنى جويۋ تۋرالى رەسمي شەشىمنىڭ نەگىزىندە 3 جۇمىس كۇنى ىشىندە كورسەتىلەتىن قىزمەتتى الۋشىعا شارتتى بۇزۋ تۋرالى حابارلاما جىبەرۋگە مىندەتتى.
