ساحناعا شەگىپ شىعاتىن «شەگىرتكەلەر» شەكتەن شىقتى - احمەتبەك نۇرسيلا
استانا. KAZINFORM - قاتارىنان «وزا تۋعان» تانىمال ونەر جۇلدىزدارىنىڭ قاتارىنان قامالۋى قوعامدا ءالى قىزۋ تالقىلانىپ جاتىر.
ازىلكەش پەن انشىلەردىڭ ارەكەتى دۇرىس پا، انشەيىندە جۇرتتى سابىرعا شاقىراتىن ونەر يەلەرى نەگە سابىرسىزدىق تانىتتى؟ بۇل وقيعاعا قاتىستى تانىمال ازاماتتاردىڭ پىكىرىن سۇراپ بىلگەن ەدىك.
بەلگىلى كاسىپكەر، پسيحولوگ احمەتبەك نۇرسيلا قاي زاماندا بولسىن قوعامنىڭ قادىر تۇتار تۇلعالارى بولاتىنىن، وكىنىشكە قاراي، قازىرگى قوعامدا قۇندىلىعى جوق، مادەنيەتتەن جۇرداي سايقىمازاقتار، ءانشىسىماق «شەگىرتكەلەر» جۇلدىز بولعانىن ايتادى:
«اسەت نايمانباي ۇلى ايتقانداي:
اسۋعا ات شىقپايتىن اربا شىقتى،
قاندى بالاق قىراندى قارعا جىقتى،
قوپادا وگىز سوققان جولبارىستار،
قوياننان قورىققانىنان جارعا بۇقتى.
ياعني، قوعام داعدارىپ تۇرعان كەزەڭدە قوعامنىڭ قادىرلىسى بولىپ، جۇلدىزدار بولىپ «شەگىرتكەلەر» شىقتى. باياعىدا بالۋان شولاق، اقان سەرى، ءبىرجان سال سياقتى تۇلعالاردى ادامدار توبەسىنە كوتەرگەن. ولاردىڭ مادەنيەتى، كىسىلىگى، ادامگەرشىلىگى وتە جوعارى بولعان. ەلگە ءسوزى ءوتىپ، قورعان بولعان. سوندىقتان حالىق ولاردى قۇرمەتتەدى. ال قازىرگى توقىراۋ زامانىندا دۇنيەقوڭىز سايقىمازاق، ءبىلىمسىز ادامدار تورگە شىقتى. ەڭ قورقىنىشتىسى، حالىق سولاردىڭ سوراقى قىلىقتارىن قورعاپ جاتىر.
مەيرامبەك بەسپايەۆ تا «ەركەلىك قوي» دەپ قورعاپ الەك. ەركەلىگىن اكە-شەشەسىنە كورسەتسىن. حالىققا ونداي ەركەلىك جۇرمەيدى. ءىشىپ الىپ، قوعامدىق جەردە ۇرىس، توبەلەس شىعارىپ، ساحناعا اناشا شەگىپ شىعۋ دەگەن بارىپ تۇرعان باسسىزدىق. بۇل قوعامنىڭ دەڭگەيىن دە كورسەتەدى. دامىعان ەلدەردە پارا العان، بىردەڭە بۇلدىرگەن مينيسترلەر بىردەن جۇمىستان كەتەتىن ەدى. قوعام الدىندا جۇرگەن ادامدار شالىس باسسا، قارابەت بولىپ، ەلدىڭ الدىنا شىقپاۋشى ەدى.
تۇرسىنبەك قاباتوۆ وسپادار قىلىق جاساپ الىپ، ساحاناعا شىعىپ، سونىسىن دارىپتەپ كۇلكىگە اينالدىرىپ تۇر. وعان حالىق ءماز. بۇل - قوعام الدىنداعى حالىقتىڭ قاسىرەتى. ەسەك وزىپ، تۇلپارلاردىڭ مەرەيى اقساعان زامان بولىپ تۇر. حالىقتىڭ الدىندا ءجۇرىپ وسىنداي وسپادار قىلىق كورسەتكەندەر ەلگە ۇلگى سانالسا، قوعام ەشقاشان تۇزەلمەيدى».
حالىقتىڭ سۇيىكتىسىنە اينالعان مەيرامبەك بەسبايەۆ ەلدىڭ قىزۋ تالقىسىنا تۇسكەن قايرات نۇرتاستىڭ وقيعاسىنا قاتىستى پىكىر ءبىلدىردى.
«كەيدە ەسىگىڭنەن كۇلىپ كىرىپ، تەكەمەتىڭدى ءتىلىپ كەتەتىندەر بولادى. ادام الاسى ىشىندە عوي. دوسىم دەپ ءجۇرىپ دومالاق ارىز جازىپ، قۇنى قىمبات دوستىقتى قاستىققا ايىرباستاي سالاتىن حايۋاندار كوبەيدى. قايرات ءىنىم، قۇداي جانىڭا قۋات بەرسىن. بۇلتتىڭ ارتىنان كۇن شىعاتىنى سەكىلدى، ءار جاماندىقتىڭ ارتىنان ۇلكەن جاقسىلىق بولاتىنى اقيقات. ەندى ابايلاپ ءجۇرشى. ماڭايىندا جۇرگەندەردى سۇرىپتاپ قاراشى. سەنى ساتقان اقىماقتىڭ جازاسىن اللا بەرەدى. اللا ادىلەتتى»، - دەدى بەسبايەۆ.
جۋىردا عانا ش ى ۇ سامميتىنە كەلگەن قۇرمەتتى مەيماندارعا اننەن شاشۋ شاشقان قازاقستاننىڭ ەڭبەك سىڭىرگەن ءارتىسى مايرا مۇحامەد قىزىنىڭ ايتۋىنشا، قانشا جەردەن جۇلدىز بول، قوعامدىق ورىندا ءتارتىپ ساقتاۋ - ءار ازاماتتىڭ قوعام الدىنداعى پارىزى.
«ماسەلەنىڭ تامىرى انشىلەر فونوگراممامەن ءان ايتىپ وڭاي تابىسقا جەتىپ جۇلدىز بولۋىندا جاتىر. ەگەر ماڭداي تەرمەن جانىن جەپ ايتىپ ونەر كورسەتسە، ءاربىر تابىسى مەن جەتىستىگىنە شۇكىرلىك ەتىپ ابىرويىن بيىك سانار ەدى. وكىنىشتىسى سول، حالىق فونوگراممامەن ايتاتىنىن بىلە تۇرا تويلارىنا شاقىرادى، كونسەرتتەرىنە بارادى. «قارعا قارعانىڭ كوزىن شۇقىمايدى» دەمەكشى، كەيبىر انشىلەر سونداي زاڭسىز ارەكەتتەر جاساعان ارىپتەستەرىنە قولداۋ كورسەتىپ جاتقاندارىنىڭ ءوزى دۇرىس ەمەس! قالاي تۇسىنۋگە بولادى؟ سۇرىنبەيتىن ادام جوق. ءبىراق، بەتكە ۇستار جۇلدىزدار ءسۇرىنىپ جۇرسە، باسقالاردان نە قايىر؟ «تاياقتىڭ ەكى ۇشى بار» دەمەكشى، سونداي جاعدايعا يتەرمەلەيتىن ادامدار دا جوق ەمەس! فوتوعا تۇسكىش فاناتتار دا كەيدە ءتارتىپ ساقتامايتىنى راس. ءار ايىپقا جازا بار دەمەكشى، زاڭ الدىندا ءبارىمىز بىردەيمىز!» - دەدى مايرا مۇحامەد قىزى.
بۇل وقيعاعا قاتىستى كوپتەگەن ونەر جۇلدىزىنا حابارلاستىق. ارىپتەستەرىن رەنجىتكىسى كەلمەدى مە، الدە ءوزىنىڭ دە بۇلدىرگەن ءجونسىز ارەكەتتەرى بولدى ما، ايتەۋىر پىكىر بىلدىرۋدەن باس تارتتى.
