ساحا رەسپۋبليكاسى اسىق اتۋدان دۇنيەجۇزىلىك كوشپەندىلەر ويىندارىنا قاتىسادى
استانا. KAZINFORM - بۇگىن استانا قالاسىندا ساحا (ياكۋتيا) رەسپۋبليكاسىنىڭ قازاقستانداعى كۇندەرى باستالدى. استانا مەن الماتى قالالارىندا 21-ساۋىرگە دەيىن جالعاساتىن كۇندەر اياسىندا باۋىرلاس ەكى ەل اراسىنداعى مادەني، سپورتتىق، ىسكەرلىك باعىتتا كوپتەگەن شارا ۇيىمداستىرۋ جوسپارلانعان.
ق ر اسىق اتۋ فەدەراتسياسىنىڭ باسپا ءسوز قىزمەتى ءمالىم ەتكەندەي، ءىس- شارانىڭ ءبىرىنشى كۇنى قازاقستان پرەزيدەنتى قاسىم-جومارت توقايەۆ ساحا رەسپۋبليكاسىنىڭ باسشىسى ايسەن نيكولايەۆتى قابىلداپ ەكى ەل اراسىنداعى اۋىل شارۋاشىلىعى، كەن ءوندىرۋ، تسيفرلاندىرۋ جانە تۋريزم سالالارىنداعى ىنتىماقتاستىق تالقىلاندى.
سونىمەن قاتار ق ر اسىق اتۋ فەدەراتسياسىنىڭ اتقارۋشى ديرەكتورى جومارت سابىرجان ۇلى مەن ساحا رەسپۋبليكاسى مەملەكەتتىك بيۋدجەتتىك مەكەمەسىنىڭ ديرەكتورى گەننادي ۆاسيليەۆ ساحا رەسپۋبليكاسى دەنە شىنىقتىرۋ جانە سپورت مينيسترلىگىنىڭ ۆاسيلي مانچاارى اتىنداعى ۇلتتىق سپورت تۇرلەرى ورتالىعى مەن ق ر اسىق اتۋ فەدەراتسياسى اراسىندا ىنتىماقتاستىق تۋرالى مەموراندۋمعا قول قويدى.
الداعى ۋاقىتتا قازاقتىڭ ۇلتتىق اسىق اتۋ جانە بەس اسىق ويىنى ساحا رەسپۋبليكاسىندا دامىتىلىپ، بىرلەسكەن وقۋ-جاتتىعۋ جيىندارى مەن جارىستار وتكىزىلەتىن جانە دۇنيەجۇزىلىك كوشپەندىلەر ويىندارىنا ساحا رەسپۋبليكاسى اسىق اتۋدان كوماندا اكەلەتىن بولدى.
بۇدان بولەك ياكۋتتىڭ حابىلىك جانە حاامىسكا ويىندارىن دا بىرلەسە دامىتۋ جونىندە كەلىسىلدى.
اۆتور
كۇنسۇلتان وتارباي
