سادىر جاپاروۆ قىرعىزستاننان جاسىرىن التىن شىعارۋ تۋرالى ۆيدەونى فەيك دەپ اتادى
استانا. KAZINFORM - قىرعىزستان پرەزيدەنتى سادىر جاپاروۆ «كابار» اگەنتتىگىنە بەرگەن سۇحباتىندا ەلدەن التىن شىعارۋعا بايلانىستى رەزونانس تۋدىرعان ۆيدەوعا تۇسىنىك بەردى.
الەۋمەتتىك جەلىدە تاراعان ۆيدەودا قىرعىز التىنى شەتەلگە جاسىرىن شىعارىلعانى جانە بۇعان پرەزيدەنتتىڭ ۇلكەن اعاسى سابىر جاپاروۆتىڭ قاتىسى بار ەكەنى ايتىلعان.
«بۇل ۆيدەونى العاش كورگەندە مەنىڭ كۇلكىم كەلدى. التىن ۇرلاپ، ونى شەتەلگە شىعارىپ جاتقاندار وسىنداي ۆيدەونى وزدەرى ءتۇسىرىپ، الەۋمەتتىك جەلىگە تاراتا الا ما؟ بۇگىندە ەلىمىزدەگى مەملەكەتتىك التىن كەنىشتەرىنەن ءبىر توننا تۇگىلى، ءبىر گرام دا التىن ۇرلاۋ مۇمكىن ەمەس»، - دەپ جاۋاپ بەردى سادىر جاپاروۆ.
ونىڭ ايتۋىنشا، بارلىق مەملەكەتتىك التىن كەنىشتەرى مەن قارا-بالتاداعى اففيناج زاۋىتىندا بەينەكامەرالار ورناتىلعان. بەينە تاۋلىك بويى ءتۇسىرىلىپ، كومپيۋتەرگە جازىلادى. اعالارى مەن وتباسىنا قاتىستى ساۋالعا جاۋاپ بەرگەن سادىر جاپاروۆ ولاردىڭ شەتەلگە ەشنارسە ەكسپورتتامايتىنىن، كەرىسىنشە ەلگە شەتەلدەن اكەلەتىنىن اتاپ ءوتتى.
«مەن قانشا ۋاقىت پرەزيدەنت بولاتىنىمدى بىلمەيمىن، ونى تەك ءبىر قۇداي عانا بىلەدى. پرەزيدەنتتىك مەرزىمىم اياقتالىپ، قىزمەتتەن كەتەتىن بولسام، مەن عانا ەمەس، مەنىڭ تۋىستارىم مەن بالالارىمنىڭ ءارقايسىسى ءبىزدىڭ ەلگە ينۆەستيتسيا رەتىندە قانشا جانە قايدان قاراجات تارتقانى، قانداي مەكەمەلەر سالعانى، قانشا اقشا سالعانى، قىرعىزستانعا قانداي پايدا اكەلگەنى تۋرالى ەسەپ بەرەدى»، - دەپ اتاپ ءوتتى ول.
مىسال رەتىندە قىرعىز رەسپۋبليكاسىنىڭ پرەزيدەنتى التىن ءوندىرۋ سالاسىنداعى پايدا تۋرالى ستاتيستيكالىق دەرەكتەردى كەلتىردى. ايتۋىنشا، «قىرعىزالتىن» كومپانياسىنىڭ 2020-جىلعا دەيىنگى تازا تابىسى نەبارى 340 ميلليون سوم بولسا، 2023-جىلى 12 ميلليارد 600 ميلليون سومعا جەتكەن. مۇنداي كورسەتكىشتەر تەك «قىرعىزالتىن» مەن «قۇمتوردا» عانا ەمەس، كەدەن جانە سالىق جۇيەسىندە دە وسكەن.
تاۋەلسىزدىك العاننان بەرى 2020-جىلعا دەيىن ۇلتتىق قور بار بولعانى 16 تونناعا جەتتى. بۇگىندە رەسپۋبليكالىق قور - 52 توننا. بۇل سوڭعى ءۇش جىلداعى عانا جەتىستىك. جىل سوڭىنا دەيىن بۇل ساندار ءالى دە ارتادى، دەگەن سادىر جاپاروۆ جالعان ۆيدەولارعا سەنبەۋگە شاقىردى.
«ۋاقىت ءبارىن ءوز ورنىنا قويادى. ەندى جاساندى ينتەللەكت كومەگىمەن كەز كەلگەن ادامنىڭ داۋىسىنا ەلىكتەيتىن بەينەروليك جاساۋعا بولادى»، - دەپ اتاپ ءوتتى ول.
