سادىر جاپاروۆ قازاقستانعا رەسمي ساپارمەن كەلەدى
استانا. KAZINFORM - قىرعىز رەسپۋبليكاسىنىڭ پرەزيدەنتى سادىر جاپاروۆ قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ شاقىرۋىمەن 18-19-ساۋىردە قازاقستانعا كەلەدى.
قىرعىز رەسپۋبليكاسى پرەزيدەنتى اكىمشىلىگىنىڭ سىرتقى ساياسات ءبولىمىنىڭ مەڭگەرۋشىسى مۇراتبەك ازىمباكييەۆتىڭ ايتۋىنشا، ساپار بارىسىندا سادىر جاپاروۆ قازاقستان پرەزيدەنتى قاسىم-جومارت توقايەۆپەن ەكىجاقتى كەلىسسوزدەر جۇرگىزەدى.
تاراپتار ءوزارا قىزىعۋشىلىق تۋدىراتىن بارلىق سالاداعى ەكىجاقتى ىنتىماقتاستىقتىڭ وزەكتى ماسەلەلەرىن، سونداي-اق قىرعىز-قازاق قاتىناستارىنىڭ دامۋ پەرسپەكتيۆالارىن تالقىلايدى.
ساپار اياسىندا قىرعىز رەسپۋبليكاسىنىڭ پرەزيدەنتى سادىر جاپاروۆ قىرعىز رەسپۋبليكاسى مەن قازاقستان رەسپۋبليكاسى جوعارى مەملەكەتارالىق كەڭەسىنىڭ التىنشى وتىرىسىنا قاتىسىپ، استاناداعى قىرعىزستان باتىرى «ماناسقا» ارنالعان ەسكەرتكىشتىڭ اشىلۋ سالتاناتىنا قاتىسادى.
ساپار اياسىندا «قىرعىزستان - قازاقستان» بيزنەس-فورۋمى، اقساقالدار مەن شىعارماشىل زيالى قاۋىم وكىلدەرىنىڭ دوڭگەلەك ۇستەلى، قىرعىز-قازاق جاستار فورۋمى جانە «قىرعىزستان-قازاقستان» اتتى عالىمدار فورۋمى سياقتى ءبىرقاتار ءىس-شارالاردىڭ وتكىزىلەتىنى ايتىلدى.
