سادىر جاپاروۆ ەكس-پرەزيدەنت اسقار اقايەۆ جۇمىسىنداعى باستى قاتەلىكتەردى اتادى

استانا. KAZINFORM - قىرعىزستان پرەزيدەنتى سادىر جاپاروۆ «كابار» اگەنتتىگىنە بەرگەن سۇحباتىندا اسقار اقايەۆتىڭ بيلىگى كەزىندە جىبەرگەن قاتەلىكتەرى تۋرالى ايتتى.

قىرعىزستان باسشىسىنىڭ ايتۋىنشا، ەلدىڭ تۇڭعىش پرەزيدەنتى اسقار اقايەۆتىڭ باستى قاتەلىكتەرىنىڭ ءبىرى - ەلدەگى جەكەشەلەندىرۋ ۇدەرىسىن باقىلاي الماعانى.

- قولىندا اقشا مەن بيلىك بارلار حالىقتىڭ مۇلكىن تالان-تاراجعا سالدى. جۇمىس ىستەپ تۇرعان زاۋىتتار مەن فابريكالار جويىلىپ، ستانوكتار شەتەلگە ساتىلدى، - دەدى ول.

سادىر جاپاروۆ قۇلدىراعان اۋىل شارۋاشىلىعى ماسەلەسىن دە اتاپ ءوتتى.

- اۋىل شارۋاشىلىعى ماسەلەسىندە اقايەۆ كىنالى ەمەس، سەبەبى ول اگرونوم ەمەس، عالىم. اۋىل شارۋاشىلىعىنىڭ جويىلۋىنا بىلىكسىز دەماگوگ ءمينيستردى كىنالاۋ كەرەك. بۇل سالاعا مارقۇم جۇمعالبەك امانبايەۆ سياقتى مىقتى مينيستر تاعايىنداۋ كەرەك ەدى. وسىلايشا اسقار اقاي ۇلى كادر تاڭداۋدا قاتەلەستى، - دەدى سادىر جاپاروۆ.

اسقار اقايەۆتىڭ ءۇشىنشى باستى قاتەلىگى - ول حالىقتى اقىرى ءوزىن قۋىپ جىبەرەتىن دارەجەگە جەتكىزگەنى.

- ەلدى 10 جىل باسقارعان سوڭ ابىرويمەن كەتۋى كەرەك ەدى. الەمدىك تاجىريبە كورسەتكەندەي، ادام پرەزيدەنت بولىپ ۇزاق قىزمەت ەتپەۋى كەرەك. ەگەر اسقار اقايەۆ قۋىپ جىبەرۋگە جەتكىزبەي، ورنىن بوساتقاندا ونىڭ تۇڭعىش پرەزيدەنت جانە ەكس-پرەزيدەنت رەتىندەگى پورترەتتەرى قازىر بارلىق جەردە ءىلۋلى تۇرار ەدى. ەگەر ءسىز 99 جاقسىلىق جاساپ، ءبىر قاتەلىك جاساساڭىز، حالىق ونى كەشىرمەيدى. ادامداردىڭ تابيعاتى سونداي، وعان رەنجۋدىڭ قاجەتى جوق. جاقسىلىق تەز ۇمىتىلادى، ال جاماندىق ەشقاشان ۇمىتىلمايدى، دەدى قىرعىز باسشىسى.

بۇعان دەيىن حابارلاعانىمىزداي، قىرعىزستاننىڭ بۇرىنعى مەملەكەت باسشىسى اسقار اقايەۆ ەل پارلامەنتىنە ەكس-پرەزيدەنت مارتەبەسىن قايتارۋدى سۇراپ حات جولداعان بولاتىن.

5-قىركۇيەكتە ءوتىنىش قىرعىز رەسپۋبليكاسى جوگوركۋ كەنەشىنىڭ كونستيتۋتسيالىق زاڭناما، مەملەكەتتىك قۇرىلىس، سوت-قۇقىقتىق ماسەلەلەر جانە رەگلامەنت كوميتەتىنىڭ قاراۋىنا جىبەرىلدى.

مينيسترلەر كابينەتى ءتوراعاسىنىڭ ورىنباسارى ەدىل بايسالوۆتىڭ ايتۋىنشا، اسقار اقايەۆتىڭ حاتى دۇرىس مەكەنجايعا باعىتتالماعان.

كەيىن قىرعىزستان پرەزيدەنتى سادىر جاپاروۆ اسقار اقايەۆتىڭ ۇندەۋىنە جاۋاپ بەردى.

24-قىركۇيەكتە قىرعىز رەسپۋبليكاسى جوگوركۋ كەنەشىنىڭ كونستيتۋتسيالىق زاڭناما، مەملەكەتتىك قۇرىلىم، سوت-قۇقىقتىق ماسەلەلەر جانە رەگلامەنت جونىندەگى كوميتەتى ا. اقايەۆتىڭ ءوتىنىشىن قاناعاتتاندىرۋدان باس تارتۋ تۋرالى شەشىم قابىلدادى.

ءبىر كۇن بۇرىن جوگوركۋ كەنەش وتىرىسىندا دەپۋتاتتار ەكس-پرەزيدەنت مارتەبەسىن قالپىنا كەلتىرۋگە قارسى داۋىس بەرگەن بولاتىن.