سادىر جاپاروۆ بۇزاقىلىق جاسادى دەپ ايىپتالعان جاقتاستارىنىڭ ۇستالۋىنا قاتىستى پىكىر ءبىلدىردى

استانا. KAZINFORM - بىشكەكتە پوليتسەيلەر بۇزاقىلىق جاسادى دەگەن كۇدىككە ىلىنگەن ءبىر توپ ادامدى ۇستادى، التى ادامنىڭ فوتوسى جاريالاندى.

ينتەرنەت پايدالانۋشىلارى كوپشىلىگىن «مەكەنچيل» پارتياسىنىڭ وكىلدەرى دەپ تانىپ، ولاردىڭ ۇستالۋى الەۋمەتتىك جەلىدە قىزۋ تالقىعا ءتۇستى. قىرعىزستان پرەزيدەنتى سادىر جاپاروۆ جاعدايعا قاتىستى پىكىر ءبىلدىردى، دەپ حابارلايدى «كابار» اقپارات اگەنتتىگى.

«سوڭعى كەزدە وزدەرىن «مەكەنچيل» پارتياسىنىڭ مۇشەسى دەپ جۇرگەن الاياقتار مەن بوپسالاۋشىلار پايدا بولدى. ۇستالعانداردىڭ ەكەۋى بوپسالاۋمەن اينالىسادى. ولار بوپسالاۋ ارقىلى وڭاي اقشا تاپقان. قالعان ۇشەۋىنە نە بولعانىن بىلمەيمىن. ۇستالعانداردىڭ ءبىرىنىڭ حابارلامالارىن، تەلەفون قوڭىراۋلارىن جانە داۋىس جازبالارىن كورگەندە، مەن وعان تەلەفون سوعىپ: «جىگىتتەر، مۇنداي لاس جولمەن كۇن كورۋدىڭ قاجەتى جوق. كاسىپكەرلىكپەن اينالىسىپ، لايىقتى ادام رەتىندە ءومىر سۇرىڭدەر» دەدىم. بارلىق ۇساق-تۇيەك ءمان-جايلاردى ايتپايمىن. ونىڭ تۋىستارى ءبارىن جاقسى بىلەدى. وتباسىنىڭ الدىندا ەسكەرتتىم: «سەن ءالى جاسسىڭ. ەڭبەك ەت، ادال ەڭبەكپەن تابىس تاپ» دەدىم»، - دەدى س. جاپاروۆ.

سونداي-اق ول ەگەر بىرەۋ زاڭسىز ارەكەتكە بارسا، بوپسالاۋ نەمەسە سىبايلاس جەمقورلىقپەن اينالىسسا، «مەكەنچيل» ۇيىمىنىڭ مۇشەسى مە، جوق پا، جاۋاپكەرشىلىككە تارتىلاتىنىن قوسىپ ءوتتى.

«بوپسالاۋشىلاردىڭ بىرەۋدى «پرەزيدەنتكە شاعىم ءتۇسىرىپ، ونى قىزمەتىنەن كەتىرەمىز» دەپ قورقىتىپ جاتقانىن بىلگەن بويدا ەكى جاققا دا تەلەفون سوعىپ، ەسكەرتتىم: «مەن قاي مەملەكەتتىك قىزمەتكەردىڭ قالاي جۇمىس ىستەيتىنىن انىق كورىپ تۇرمىن. قازىر زامان باسقا. مەملەكەت قازىناسىنان ءبىر تيىن دا ۇرلاۋ مۇمكىن ەمەس. ماعان بۇرىن كىمنىڭ قاي پارتيامەن سايلاۋعا قاتىسقانى ماڭىزدى ەمەس»، - دەپ ءتۇسىندىردى ول.

پرەزيدەنت بولعان توبەلەس پەن شارالاردىڭ بىرىندە جاسىرىن كامەرانىڭ تابىلىپ، كەيىن بەلگىلى ءبىر بەينەجازبانىڭ جاريا ەتىلۋى اراسىنداعى بايلانىستى جوققا شىعاردى. ول سونداي-اق وعان ۇكىمەتتىڭ قاتىسى بار ەكەنىن جوققا شىعارىپ، ىستەر تەرگەلىپ جاتقانىن ايتتى.

ەسكە سالا كەتسەك، كەشە بىشكەك قالالىق ءى ءى ب قالا تۇرعىنىن ۇرىپ-سوعىپ، ۇستادى دەگەن كۇدىككە ىلىنگەن التى ەر ادامنىڭ ۇستالعانىن حابارلادى. بۇل وقيعا الەۋمەتتىك جەلىلەردە قىزۋ تالقىلانىپ، كەيبىر قولدانۋشىلار ۇستالعانداردى «مەكەنچيل» پارتياسىنىڭ مۇشەلەرى دەپ اتادى.