ساۋدا ورتالىعىنداعى ويىن الاڭىندا 10 جاسار قىز بيىكتەن قۇلاپ، جاراقات العان

трц
فوتو: Pixabay

اتىراۋ. KAZINFORM - اتىراۋدا ساۋدا ورتالىعىنداعى ويىن الاڭىندا 10 جاسار قىز بيىكتەن قۇلاپ، جاراقات العان.

وقيعا، 9-مامىر كۇنى كەشكى مەزگىلدە اتىراۋ قالاسىندا ورنالاسقان ساۋدا ورتالىعىنداعى ويىن الاڭىندا بولعان.

ويىن الاڭىنداعى قورعانىش بەلدىگى ءۇزىلىپ، جاس ءوسپىرىم بيىكتەن قۇلاعان. سوعان بايلانىستى اتا-اناسى وقيعا ورنىنا جەدەل جاردەم بريگاداسىن شاقىرعان.

«جەدەل جاردەم بريگاداسىنىڭ دارىگەرلەرى جاس وسپىرىمگە العاشقى مەديتسينالىق كومەك كورسەتىپ، وبلىستىق بالالار اۋرۋحاناسىنا جەتكىزدى. اۋرۋحانا دارىگەرلەرى 10 جاسار قىزدىڭ سول جاق شىنتاق بۋىنىنىڭ جابىق جاراقاتى بارىن انىقتادى. مۇنداي جاراقات وڭ جامباسىندا دا بولعان. دارىگەرلەردىڭ تەكسەرۋىنەن سوڭ ستاتسيونارلىق ەمدەۋ شاراسى قاجەتتىگى تۋىندامادى. سول سەبەپتەن، جاراقات العان جاس ءوسپىرىم امبۋلاتورلىق ەم الۋ ءۇشىن ۇيىنە جىبەرىلدى»، - دەپ حابارلادى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.

اۆتور
جولداسبەك شوپەعۇل

سوڭعى جاڭالىقتار