ساۋدا جانە ينتەگراتسيا مينيسترلىگى ەل اۋماعىنان شىعارۋعا، كىرگىزۋگە تىيىم سالىنعان تاۋارلاردى اتادى

ساۋدا جانە ينتەگراتسيا مينيسترلىگى ەل اۋماعىنان شىعارۋعا نەمەسە شەكارادان كىرگىزۋگە تىيىم سالىنعان تاۋار تۇرلەرىن اتادى.

ماسەلەن، 11- قازاننان باستاپ بيدايدى ءۇشىنشى ەلدەردەن جانە ەاەو ەلدەرىنەن قازاقستان اۋماعىنا اۆتوكولىكپەن اكەلۋگە تىيىم سالۋ ۇزارتىلادى. تىيىم سالۋ مەرزىمى – 6 اي، دەپ حابارلايدى قازاقپارات.

سونىمەن بىرگە 15- قازانعا دەيىن قازاقستان اۋماعىنان مۇزداتىلعان، جاڭا مۇزداتىلعان نەمەسە سالقىنداتىلعان بالىق تۇرلەرىن شىعارۋعا تىيىم سالىناتىنىن دا مالىمدەدى.

"بيىلعى 2- قاراشاعا دەيىن ەلدەن قارا جانە ءتۇستى مەتالداردىڭ سىنىقتارى مەن قالدىقتارىنىڭ جەكەلەگەن تۇرلەرىن اكەتۋگە تىيىم سالىنادى.

ال 14- قاراشاعا دەيىن قازاقستاننان تاس كومىردى، بريكەتتەردى، تۇيىرشىكتەردى جانە تاس كومىردەن الىنعان قاتتى وتىننىڭ ۇقساس تۇرلەرىن اۆتوموبيل كولىگىمەن اكەتۋگە بولمايدى.

29- قاراشاعا دەيىن قازاقستان اۋماعىنان امموفوس پەن اممونيي نيتراتىن اۆتوموبيل كولىگىمەن اكەتۋگە تىيىم سالىندى"، - دەپ جازدى مينيسترلىكتەن.

10- جەلتوقسانعا دەيىن تەمىر جول نەمەسە ترامۆاي جولدارىنا ارنالعان قىلقان جاپىراقتى اعاش شپالدارىن قوسپاعاندا، شىققان ەلىنە قاراماستان، اعاش ماتەريالدارىنىڭ جەكەلەگەن تۇرلەرىن ەلدەن اكەتۋگە تىيىم سالىندى.

"2024 -جىلعى 27- قاڭتارعا دەيىن قازاقستان اۋماعىنان اۆتوموبيل كولىگىمەن بەنزيندەردى، ديزەل وتىنىن جانە مۇناي ونىمدەرىنىڭ جەكەلەگەن تۇرلەرىن اكەتۋگە تىيىم سالىندى"، - دەلىنگەن ۆەدومستۆو حابارلاماسىندا.