ساۋدا ءمينيسترى جاڭا جىل داستارحانى تۋرالى: ءبارى تابەت پەن ءاميانعا بايلانىستى

ماجىلىستەگى ساۋدا ساياساتىن دامىتۋ ماسەلەلەرىنە ارنالعان ۇكىمەت ساعاتىنان كەيىن ب ا ق وكىلدەرىنىڭ ساۋالىنا جاۋاپ بەرگەن ساۋدا جانە ينتەگراتسيا ءمينيسترى ارمان شاققاليەۆ جاڭا جىل داستارحانىنىڭ باعاسى تۋرالى پىكىر ءبىلدىردى، دەپ حابارلايدى Kazinform.

«سەنبىدە سىزدەردىڭ ارىپتەستەرىڭىزبەن بىرگە («وبوجايۋ» You Tube ارناسى تۋرالى ايتىپ وتىر - رەد.) بازارعا باردىق. ءوزىم دە تاڭعالدىم، ءبىراق بۇل جاڭا جىلعا ارنالعان سەبەت ەمەس ەدى. ءىرى كولەمدە ازىق-تۇلىك ساتىپ العانمىن، ول ماعان 24 مىڭ تەڭگەگە ءتيدى.

ءداستۇرلى جاڭا جىل داستارحانى 37 ءتۇرلى تاۋاردان تۇراتىنى تۇسىنىكتى. «وليۆە»، «سەلد پود شۋبوي»، ماندارين، اناناس سياقتى تاۋارلاردىڭ باعاسىنا كەلسەك، 9,8 پايىز قىمباتتاعانىن ەسەپتەپ شىعاردىق.

مەن ايتتىم، 37 ءتۇرلى تاۋاردىڭ ءبارىن ساتىپ العان جوقپىن. بازارداعى ءبىر اجە ايتقان ءسوز ۇنادى: «ءبارى تابەتىڭىز بەن ءاميانىڭىزعا بايلانىستى». مەن دە سولاي دەر ەدىم»، - دەدى مينيستر.

ونىڭ پايىمىنشا، ورتاشا تۇتىنۋ سەبەتى وسىنشا تۇرادى دەپ ايتۋ مۇمكىن ەمەس.

«مەن قۇرما، قىزاناق، قيار، ەت، ءسۇت ونىمدەرىن، ەكى شەلپەك الدىم. جالپى جاقسى ءبىر ستاندارتتى سەبەت الدىق. سوعان 24 مىڭ تەڭگە بەردىم. بازار بولعان سوڭ ساۋدالاستىق، ارينە.

جاڭا جىل اركىمنىڭ جەكە مەرەكەسى. ءبىراق ءبارى «وليۆە يندەكسىنە» قارايدى دەگەندەي عوي. سوندىقتان ءبارى تابەتىڭىز بەن ءاميانىڭىزعا بايلانىستى»، - دەدى ارمان شاققاليەۆ.