ساۋدا ءمينيسترى موبيلدى 100 اۋدارىم تۋرالى: مىنا شەكتەۋدى دۇرىستاپ قاراۋ كەرەك
استانا. KAZINFORM -ساۋدا جانە ينتەگراتسيا ءمينيسترى ارمان شاققاليەۆ موبيلدى اۋدارىمداردى قايتا قاراۋ ماسەلەسىنە پىكىر ءبىلدىردى.
مينيسترلىكتىڭ القا ماجىلىسىنەن كەيىن وتكەن بريفينگىدە ارمان شاققاليەۆكە موبيلدى اۋدارىمدار تۋرالى سۇراق قويىلدى.
«ۇكىمەتتىڭ كەڭەيتىلگەن وتىرىسىنان كەيىن موبيلدى اۋدارىم ماسەلەسى قايتا قارالاتىن بولدى. تۇتىنۋشىلاردىڭ قۇقىعىن قورعايتىن ورگان باسشىسى رەتىندە قانداي ۇسىنىس بەرەسىز. باقىلاۋعا الىناتىن اۋدارىم سانى 100 دەن كوپ بولۋ كەرەك پە؟» - دەپ سۇرادى جۋرناليست.
ۆەدومستۆو باسشىسى بۇل رەتتەۋ شاراسى ساۋداگەرلەردىڭ جۇمىسىنا كەدەرگى كەلتىرمەيتىندەي ەتىپ ۇيىمداستىرىلۋ كەرەك ەكەنىن ايتتى.
«ءبىزدىڭ ۇستانىمىمىز - ءبىر كەدەرگىلەر جاساپ، ءبىزدىڭ ساتۋشىلارعا قيىنشىلىق جاساۋ ەمەس. ءبىز ايتىپ وتىرمىز، مىنا شەكتەۋدى دۇرىستاپ قاراستىرۋ كەرەك. ەگەر مىنا ساۋدا توقتايتىن بولسا، ساۋدا سالاسىندا جۇمىس ىستەپ جۇرگەن ادامدارعا اۋىرتپالىق بولسا، وندا ءبىز قولدامايمىز. ءبىراق ونى ەسەپتەۋ كەرەك. قارجى مينيسترلىگىندە قازىر قانشا بولۋ كەرەك دەگەنگە تالداۋ جاساپ جاتىر. مىسالى، 200 دەن استام اۋدارىمدى باقىلاۋ كەرەك پە، 300 دەن استام اۋدارىم بولۋ كەرەك پە، ناقتى دالەلدەرى كەرەك. ناقتى وسىنشا اۋدارىم بولۋ كەرەك دەپ ايتا المايمىن. نەگە دەسەڭىز، بىزگە بۇل ماسەلە بويىنشا ۇسىنىس تۇسكەن جوق»،-دەدى ارمان شاققاليەۆ.
اۆتور
ەسىمجان ناقتىباي
