ساۋد ارابياسىندا قاجىلىققا زاڭسىز قاجىلاردى اپارعانى ءۇشىن التى ادام ۇستالدى
استانا. KAZINFORM - قاجىلىققا قاتىستى قاتاڭ ەرەجەلەردى اينالىپ ءوتۋ ارەكەتى بىرنەشە ادامنىڭ ۇستالۋىنا، ءىرى ايىپپۇلدارعا جانە مۇمكىن بولاتىن تۇرمە جازاسىنا الىپ كەلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ساۋد ارابياسىنىڭ ىشكى ىستەر مينيسترلىگى سەيسەنبى كۇنى قاجىلىق ەرەجەلەرىن بۇزعان التى ازاماتتىڭ ۇستالعانىن حابارلادى. ولار قاجىلىق جاساۋعا رەسمي رۇقساتى جوق 20 ادامدى مەككەگە زاڭسىز كىرگىزۋگە ارەكەتتەنگەن.
ۇستالعاندار قاجىلىق ماۋسىمىندا ءتارتىپتى قامتاماسىز ەتۋ ماقساتىندا مەككە قالاسىنا كىرەبەرىستەردە قاۋىپسىزدىك كۇشتەرىنىڭ كۇشەيتىلگەن شارالارى اياسىندا قولعا ءتۇستى.
مينيسترلىك شەشىمىنە سايكەس، ەرەجە بۇزۋشىلارعا 100 مىڭ ساۋد ريالىنا (شامامەن 13,6 ميلليون تەڭگە) دەيىن ايىپپۇل سالىنۋى مۇمكىن. سونىمەن قاتار، ايىپ تاعىلعان جاعدايدا تۇرمە جازاسى دا قاراستىرىلعان.
بيلىك زاڭسىز تاسىمالداۋ ءۇشىن پايدالانىلعان كولىكتەردى تاركىلەۋگە جانە رۇقساتسىز قاجىلىق جاساۋعا تالپىنعان ادامداردان قوسىمشا 20 مىڭ ريالعا (شامامەن 2,7 ميلليون تەڭگە) دەيىن ايىپپۇل ءوندىرىپ الۋعا شەشىم شىعاردى.
مينيسترلىك ەرەجە بۇزۋشىلاردىڭ اتى-جوندەرىن جاريالاپ، وقيعاعا قاتىسى بار شەتەل ازاماتتارىن جازا مەرزىمى اياقتالعان سوڭ دەپورتاتسيالاپ، ولارعا 10 جىلعا دەيىن ساۋد ارابياسىنا قايتا كىرۋگە تىيىم سالۋدى تاپسىردى.
ۆەدومستۆو بارلىق ازامات پەن تۇرعىندى قاجىلىققا قاتىستى بەكىتىلگەن ەرەجەلەردى قاتاڭ ساقتاۋعا شاقىردى، بۇل قاجىلاردىڭ قاۋىپسىزدىگى مەن اماندىعىن قامتاماسىز ەتۋ ءۇشىن قاجەت.
سەيسەنبى كۇنى ساۋد ارابياسىنىڭ بيلىگى قاجىلىققا قاتىسۋ ءۇشىن ەلگە 1,1 ميلليون ادامنىڭ كەلگەنىن حابارلادى.
ايتا كەتەلىك ساۋد ارابياسى قاجىلىق ەرەجەلەرىن بۇزعاندارعا قاتاڭ ايىپپۇلدار ەنگىزگەنى تۋرالى حابارلاعان ەدىك.
