ساۋد ارابياسىندا ۋكراينا-امەريكا كەلىسسوزدەرى ءوتىپ جاتىر
استانا. KAZINFORM - كەلىسسوز بارىسىندا ۋكراينا ا ق ش- قا رەسەيمەن اتىستى ءىشىنارا توقتاتۋ جوسپارىن ۇسىنادى، دەپ حابارلايدى kazinform اگەنتتىگىنىڭ مەنشىكتى ءتىلشىسى.
ۋكراينانىڭ سىرتقى ىستەر مينيسترلىگى سەيسەنبى كۇنى ا ق ش پەن ۋكراينا دەلەگاتسياسى دجيددا قالاسىندا كەزدەسۋدى باستاعانىن حابارلادى. ا ق ش پەن ۋكراينانىڭ جوعارى لاۋازىمدى تۇلعالارىنىڭ كەزدەسۋى ساۋد ارابياسىنىڭ باتىسىندا ورنالاسقان دجيددا قالاسىنداعى Ritz-Carlton قوناق ۇيىندە وتەدى.
شەنەۋنىكتەر جۋرناليستەردىڭ ا ق ش- تىڭ اسكەري كومەكتى توقتاتۋى جانە ۋكراينانىڭ جارتىلاي اتىستى توقتاتۋ تۋرالى ۇسىنىسى بويىنشا سۇراقتارىنا جاۋاپ بەرۋدەن باس تارتتى، دەپ حابارلايدى CNN.
ۇستەل باسىندا ساۋد ارابياسىنىڭ ۇلتتىق قاۋىپسىزدىك جونىندەگى كەڭەسشىسى ءارى سىرتقى ىستەر ءمينيسترى وتىر. ا ق ش مەملەكەتتىك حاتشىسى ماركو رۋبيو ۇلتتىق قاۋىپسىزدىك جونىندەگى كەڭەسشى مايكل ۋولتتسپەن قاتار وتىر.
ۋكراينا جاعىنان ۇستەلدىڭ ورتا شەنىندە زەلەنسكيدىڭ باس كومەكشىسى اندرەي ەرماك، ونىڭ جانىندا سىرتقى ىستەر ءمينيسترى اندرەي سيبيگا جانە قورعانىس ءمينيسترى رۇستەم ۋمەروۆ بار.
ۆلاديمير زەلەنسكي اكىمشىلىگىنىڭ باسشىسى اندرەي ەرماكتىڭ ايتۋىنشا، ۋكراينا ا ق ش شەنەۋنىكتەرىمەن بۇگىنگى كەلىسسوزدەرگە «وتە اشىق» پوزيتسيامەن كەلدى.
- قازىر ءبىز ەڭ الدىمەن بۇل پروتسەستى قالاي باستاۋ كەرەكتىگىن تالقىلاۋ قاجەت دەپ ەسەپتەيمىز، - دەدى ەرماك قوناق ءۇيدىڭ فويەسىندە جۋرناليستەرگە بەرگەن سۇحباتىندا.
ەرماك كەلىسىمگە كەلگەننەن كەيىن رەسەي قايتادان شابۋىل جاساي الماۋى ءۇشىن امەريكا قۇراما شتاتتارىنىڭ قاۋىپسىزدىك كەپىلدىگى «وتە ماڭىزدى» دەدى. ءبىراق كەزدەسۋدىڭ باسىمدىعى ماسكەۋمەن كەلىسسوزدەر ارقىلى بەيبىتشىلىككە قول جەتكىزۋ پروتسەسىن باستاۋ ەكەنىن ايتتى.
مەملەكەتتىك حاتشى ماركو رۋبيو ساۋد ارابياسىنا ا ق ش پەن ۋكراينانىڭ رەسمي تۇلعالارى اراسىندا اسكەري قاقتىعىستى توقتاتۋ ماقساتىندا كەلىسسوزدەر جۇرگىزۋ ءۇشىن كەلگەنىن جازعان بولاتىنبىز.
