ساۋد ارابياسىنا ۆاكسيناسىز كىرۋگە رۇقسات جوق

استانا. KAZINFORM - ساۋد ارابياسىنىڭ دەنساۋلىق ساقتاۋ مينيسترلىگى 2024 -جىلى قاجىلىققا بارۋ ءۇشىن ۆاكسينالاۋ نۇسقاۋلارىن جاريالاپ، ونىڭ قاجىلىققا بارۋشى بارلىق ادامداردىڭ دەنساۋلىعىن ساقتاۋداعى ماڭىزدىلىعىن اتاپ كورسەتتى. Kazinform اگەنتتىگىنىڭ ءتىلشىسى قازاقستاننان قاجىلىققا باراتىنداردان قانداي ەكپە تالاپ ەتىلەتىنىن ناقتىلادى.

2024 -جىلعى قاجىلىق (مۇسىلمان حرونولوگياسى بويىنشا 1445) 14-ماۋسىمدا باستالادى، قازاقستاندىق قاجىلار كيەلى جەرلەرگە الدىن الا – 5-ماۋسىمنان باستاپ بارادى.

جىل سايىن قاجىلىققا الەمنىڭ تۇكپىر-تۇكپىرىنەن ەكى ميلليونعا جۋىق ءدىندار كەلەدى. 2024 -جىلى ساۋد ارابياسىنىڭ قاجىلىق جانە ۋمرا مينيسترلىگى قازاقستانعا 10 مىڭ ورىندىق كۆوتا ءبولدى.

جىل سايىن ساۋد ارابياسىنىڭ دەنساۋلىق ساقتاۋ مينيسترلىگى الداعى قاجىلىق جانە ۋمرا كەزىندە كورولدىككە بارعىسى كەلەتىن قاجىلىق جاساۋشىلار مەن ماۋسىمدىق جۇمىسشىلار ءۇشىن كىرۋ ۆيزاسى تالاپتارى مەن نۇسقاۋلارىن جاريالايدى.

ساۋد ارابياسىنا بارۋ ءۇشىن مەنينگوكوكتىق مەنينگيت، پوليوميەليت جانە سارى بەزگەككە قارسى ەكپە بولۋى ءتيىس.

مەنينگوكوكتى مەنينگيت

بارلىق ەلدەردەن، سونىڭ ىشىندە قازاقستاننان قاجىلىققا بارۋشىلار ءۇشىن مي مەن جۇلىندى زاقىمدايتىن جانە اۋا-تامشىلى جولمەن بەرىلەتىن اۋىر باكتەريالىق ينفەكتسيادان قورعايتىن مەنينگوكوكتى مەنينگيتكە قارسى ۆاكسينا قاجەت ەتىلەدى.

ساۋد ارابياسى قاجىلىققا نەمەسە ۋمراعا كەلەتىن ءبىر جاستان اسقان بارلىق ساياحاتشىلاردان ءتورت ۆالەنتتى (ACWY) مەنينگوكوكقا قارسى ۆاكسينانى سوڭعى 3-5 جىل ىشىندە (ۆاكسينانىڭ تۇرىنە بايلانىستى) جانە قاجىلىققا بارۋ الدىندا كەمىندە 10 كۇن ىشىندە العانىن راستاۋدى تالاپ ەتەدى. بۇل ۆاكسينا A ،C ،W جانە Y سەروتوپتارى تۋدىراتىن مەنينگوكوكك اۋرۋىنان قورعاۋ ءۇشىن ۇسىنىلادى.

سارى بەزگەك جانە پوليوميەليت

قاجىلىققا بارۋشىلاردىڭ سارى بەزگەك پەن پوليوميەليتكە قارسى ەكپەلەرى دە بولۋى ءتيىس. تالاپ بۇل اۋرۋ تۇرلەرىنىڭ تارالۋ قاۋپى بار ەلدەر تىزىمىنەن كەلگەن قاجىلىققا بارۋشىلارعا قاتىستى، وعان قازاقستان كىرمەيدى.

ماۋسىمدىق تۇماۋ

ساۋد ارابياسىنىڭ دەنساۋلىق ساقتاۋ مينيسترلىگى شەتەلدەگى قاجىلارعا كورولدىككە كەلمەس بۇرىن ماۋسىمدىق تۇماۋعا قارسى ەكپە الۋدى ۇسىنادى. بۇل اسىرەسە تۇماۋدان اۋىر سىرقاتتانۋ قاۋپى جوعارى ادامدار، سونىڭ ىشىندە جۇكتى ايەلدەر، بەس جاسقا دەيىنگى بالالار، ەگدە جاستاعى ادامدار جانە دەنساۋلىق جاعدايى ناشار ادامدارعا قاتىستى.

جالپى ۇسىنىستار

ساۋد ارابياسىنىڭ دەنساۋلىق ساقتاۋ مينيسترلىگى قارت ادامدارعا (65 جاستان اسقان)، سوزىلمالى اۋرۋلارى بار ادامدارعا (مىسالى، جۇرەك اۋرۋى، بۇيرەك اۋرۋى، تىنىس الۋ جولدارىنىڭ اۋرۋلارى، قانت ديابەتى) جانە يممۋن تاپشىلىعى، قاتەرلى جانە ءولىم تۋدىرۋشى اۋرۋلارى بار قاجىلارعا، جۇكتى ايەلدەر مەن 12 جاسقا تولماعان بالالارعا قاجىلىققا ءوز قاۋىپسىزدىگى ءۇشىن بارۋدى كەيىنگە قالدىرۋدى ۇسىنىپ وتىر.

ساۋد ارابياسىنىڭ دەنساۋلىق ساقتاۋ مينيسترلىگى سونىمەن قاتار بارلىق قاجىلاردى تىنىس الۋ جولدارىنىڭ جۇقپالى اۋرۋلارىنىڭ تارالۋىن توقتاتۋ ءۇشىن جالپى دەنساۋلىق ساقتاۋ ەرەجەلەرىن ساقتاۋعا شاقىردى.

ساۋد ارابياسى دەنساۋلىق ساقتاۋ ورگاندارىنىڭ قاجىلىققا بارۋشىلارعا قويىلاتىن تولىق تالاپتارىن كورولدىك دەنساۋلىق ساقتاۋ مينيسترلىگىنىڭ سايتىندا اعىلشىن جانە اراب تىلدەرىندە تابۋعا بولادى.

اۆتور

زارينا تۋعانبايەۆا