ساعادات نۇرماعامبەتوۆتىڭ سەنىمىن اقتاعان شاكىرت
استانا. KAZINFORM - باستەمي جانتەمىر ۇلى تۇڭعىش قورعانىس ءمينيسترى ساعادات نۇرماعامبەتوۆتىڭ تىكەلەي باسقارۋىمەن لاۋازىمدى قىزمەتكە تاعايىندالعان. بۇگىندە جاس ۇرپاق تاربيەسىنە اتسالىسىپ جۇرگەن تۇلعا Jibek Joly تەلەارناسىنداعى «ماحاببات» باعدارلاماسىندا قوناق بولدى.
ءنوۆوسىبىر جوعارى اسكەري-ساياسي ۋچيليشەسىن ۇزدىك بىتىرگەن جاس وفيتسەر باستەمي جانتەمىر ۇلى 40 جىلدان استام ۋاقىتىن اسكەري سالاعا ارناعان. گەرمانياداعى كەڭەس اسكەرلەرىنىڭ توبىندا قىزمەت ەتىپ، ك س ر و قورعانىس ءمينيسترىنىڭ بۇيرىعىمەن اعا لەيتەنانت اسكەري اتاعىن مەرزىمىنەن بۇرىن العان. كەيىن تۋعان ەلگە ورالىپ، تۇڭعىش قورعانىس ءمينيسترى ساعادات نۇرماعامبەتوۆتىڭ تىكەلەي باسقارۋىمەن جاس وفيتسەر لاۋازىمدى قىزمەتكە تاعايىندالادى.
اسكەري سالادا تاربيەشى وفيتسەرگە ارتىلعان جۇكتىڭ سالماعى جەڭىل بولعان جوق. جەكە قۇرامنىڭ ءتارتىبى، ولاردىڭ اراسىنداعى مورالدىق احۋال، اسكەري جۇمىستىڭ تياناقتى ۇيىمداستىرىلۋىن قاداعالاۋ ءبىرىنشى مىندەت ەدى. باستەمي جانتەمىر ۇلىنىڭ باسشىلىعىمەن اتقارىلعان جۇمىس جوعارى ناتيجە كورسەتىپ، پولكوۆنيك اسكەري اتاعى مەرزىمىنەن بۇرىن تاپسىرىلعان.
زەينەت دەمالىسىنا شىققان سوڭ دا اسكەري كافەدراعا ون جىلداي باسشىلىق ەتىپ، بولاشاق وفيتسەرلەردى دايىنداپ جاتىر. بۇگىندە ول قارۋلى كۇشتەرگە قاتىستى ءىس-شارالاردىڭ بەل ورتاسىندا جۇرەدى. جاس ۇرپاق تاربيەسىندە باستەمي جانتەمىر ۇلىنىڭ ورنى ەرەكشە.
باستەمي جانتەمىر ۇلىنىڭ جارى ساعيلا پانۋ قىزى دا سانالى عۇمىرىن اسكەري سالاعا ارناعان جان. بالالارى ارمان مەن باۋىرجان دا ەلىمىزدەگى كۇشتىك قۇرىلىمداردىڭ وفيتسەرلەرى.
