ساپالى كارتوپ سىرتقا ساتىلىپ، سورەدە قىتايدىڭ ساپاسىز ءونىمى قالعانى راس پا - مينيسترلىك جاۋابى
استانا. KAZINFORM - ساۋدا جانە ينتەگراتسيا مينيسترلىگى ساۋدا كوميتەتى ءتوراعاسىنىڭ ورىنباسارى ەرنۇر جاۋتىكبايەۆ دۇكەن سورەلەرىندەگى كارتوپتىڭ ساپاسى تۋرالى سىنعا جاۋاپ بەردى.

- تۇراقتاندىرۋ قورلارىنىڭ اياسىندا 87 مىڭ توننا كارتوپقا كەلىسىمشارت جاسالعان. قازىرگى تاڭدا قازاقستان بويىنشا 50 مىڭنان استام كارتوپ قورى بار. ساپا تۋرالى ايتساق، ءقازىر ماۋسىمدار اراسىنداعى ءولارا كەزەڭ ەكەنىن وزدەرىڭىز تۇسىنۋلەرىڭىز كەرەك. قىركۇيەك ايىندا جيناپ العان كارتوپتىڭ ساقتاۋ مەرزىمى بار. بۇگىندە ونىڭ بەلگىلى ءبىر دەڭگەيدە تومەن ساپادا بولۋى - تابيعي جاعداي. سورەگە ءونىم تۇسكەننەن كەيىن ادامدار ىرىكتەپ الىپ كەتەدى. بالكىم، ءسىزدىڭ تانىستارىڭىز بارعان كەزدە ىرىكتەۋدەن قالعان كارتوپقا تاپ بولعان شىعار. دۇكەن اكىمشىلىگى اسسورتيمەنتتى جاڭارتىپ ۇلگەرمەگەن دە بولۋى مۇمكىن، - دەپ ءتۇسىندىردى ەرنۇر جاۋتىكبايەۆ.
مينيسترلىك وكىلى قازاقستاندىق فەرمەرلەر وسىرگەن ساپالى كارتوپتىڭ ءبارى سىرتقا ساتىلىپ، ىشكى نارىقتا قىتايدىڭ ساپاسىز ءونىمى عانا قالعان دەگەن ۋاجدەرگە دە جاۋاپ بەردى.
- ەكسپورت پەن يمپورت دەگەن ءاردايىم بولعان. قازىرگى الەمدە يمپورت پەن ەكسپورتتىڭ تەڭگەرىمى دەگەن بار. ءتىپتى ءوزىڭىز ايتىپ وتىرعان قىتاي كارتوبىن ساتىپ العاننىڭ وزىندە ءوز تاڭداۋىڭىزعا بايلانىستى. وزىڭىزگە قايسىسى قولايلى، سونى الاسىز. جالپى كارتوپ ساپاسىنا جاۋاپتى بىزدەن باسقا مەملەكەتتىك ورگاندار بار. سولارعا جۇگىنگەن ءجون، - دەپ قايىردى ول.
ەسكە سالساق، 28-قاڭتاردان باستاپ قازاقستان اۋماعىنان ءۇشىنشى ەلدەرگە كارتوپ شىعارۋعا تىيىم سالىنعان ەدى.
اۆتور
ەسىمجان ناقتىباي