ساۋد ارابياسىندا اۋەجايلارعا جاسالعان شابۋىلداردان ءۇش ادام وپات بولدى
استانا. KAZINFORM - حۋسيتتەر مەن يەمەننىڭ حالىقارالىق قوعامداستىق مويىنداعان ۇكىمەتىن قولدايتىن ساۋد ارابياسى باستاعان كواليتسيا اراسىنداعى قاقتىعىس ۋشىعىپ بارادى، دەپ حابارلايدى قازاقپارات Anadolu اگەنتتىگىنە سىلتەمە جاساپ.
7-قازان كۇنى ساۋد ارابياسىنىڭ ازاماتتىق اۆياتسيا باس باسقارماسى (GACA) ەكى اۋەجايعا جاسالعان شابۋىلداردان ءۇش ادام قازا تاۋىپ، 36 ادام جارالانعانىن مالىمدەگەن.
GACA دەرەگىنە سۇيەنسەك، سەيسەنبى جانە سارسەنبى كۇندەرى ءار-ريادتاعى ابحا حالىقارالىق اۋەجايى مەن كورول حاليد اتىنداعى حالىقارالىق اۋەجايعا ەكى شابۋىل جاسالعان، توتەنشە جاعدايلار قىزمەتى مەن ءتيىستى ورگاندار ەكى وقيعاعا دا جاۋاپ بەردى. اگەنتتىكتىڭ حابارلاۋىنشا، ابحا حالىقارالىق اۋەجايىنا جاسالعان شابۋىلدا ساۋد ارابياسىنىڭ ەكى تۇرعىنى وپات بولدى، ونىڭ ءبىرى ماروككولىق، ەكىنشىسى الجيردەن كەلگەن، تاعى 28 ادام جارالاندى.
جاراقات العانداردىڭ اراسىندا ەكى ساۋد ارابياسى ازاماتى، سونداي-اق بانگلادەش پەن فيليپپين ازاماتتارى بار.
اگەنتتىكتىڭ حابارلاۋىنشا، كورول حاليد حالىقارالىق اۋەجايىندا سۋدان ازاماتى مەرت بولىپ، سەگىز ادام جاراقات الدى، ونىڭ ىشىندە بەس ساۋد ارابياسى ازاماتى، ەكى مىسىر جانە ءبىر پاكىستان ازاماتى بار.
جاراقات العانداردىڭ بارلىعى دەرەۋ اۋرۋحانالارعا جەتكىزىلىپ، مەديتسينالىق كومەك الىپ جاتىر.
بيلىك وكىلدەرى زالالدى باعالاپ، جولاۋشىلار مەن اۋەجاي قىزمەتكەرلەرىنىڭ قاۋىپسىزدىگىن قامتاماسىز ەتۋ بويىنشا جۇمىس ىستەپ جاتىر.
يەمەندىك حۋسيتتەر ەكى اۋەجايعا دا شابۋىل جاساعانىن مالىمدەدى. حۋسيتتەردىڭ اسكەري وكىلى ياحيا ساري توپ ءار-ريادتاعى كورول حاليد اۋەجايىنا دروندارمەن، ال ابحا اۋەجايىنا بالليستيكالىق زىمىراندار جانە دروندارمەن شابۋىلداعانىن مالىمدەدى.
2015 -جىلدىڭ ناۋرىز ايىنان باستاپ ساۋد ارابياسى حۋسيتتەرگە قارسى كۇرەستە يەمەن ۇكىمەتىن قولدايتىن اسكەري كواليتسيانى باسقارىپ كەلەدى.
