ساۋد ارابياسى يەمەنگە اۋەدەن ءبىر تاۋلىكتە 35 سوققى جاسادى
استانا. KAZINFORM - ساۋد ارابياسى سوڭعى 24 ساعات ىشىندە يەمەننىڭ بەس پروۆينتسياسىنا 35 رەت اۋەدەن سوققى جاسادى، دەپ حابارلايدى انادولى.
بۇل تۋرالى يران قولدايتىن يەمەندىك «انسارۋللا» (حۋسيتتەر) قوزعالىسىمەن بايلانىستى «سابا» اقپارات اگەنتتىگى حابارلادى.
مالىمەتكە سايكەس، اۋە سوققىلارى تايز، ءال-دجاۋف، امران، ساادا جانە حودەيدا پروۆينتسيالارىنا، سونىڭ ىشىندە ازاماتتىق نىساندارعا جاسالعان. ساۋد ارابياسى ازىرگە بۇل مالىمدەمەلەرگە قاتىستى پىكىر بىلدىرگەن جوق.
جاعدايدىڭ ۋشىعۋىنا بايلانىستى تايز جانە لاحدج پروۆينتسيالارىندا ۇكىمەت كۇشتەرى مەن حۋسيتتەر اراسىنداعى قاقتىعىستار دا كۇشەيە ءتۇستى. ب ۇ ۇ ەلدە بەيبىتشىلىك پەن تۇراقتىلىق ورناتۋ ءۇشىن تاراپتاردى بىرلەسىپ ارەكەت ەتۋگە شاقىردى.
ب ۇ ۇ-نىڭ گۋمانيتارلىق ماسەلەلەردى ۇيلەستىرۋ باسقارماسى يەمەندەگى ۇرىس قيمىلدارىنىڭ كۇشەيۋى، حالىقتىڭ قونىس اۋدارۋى جانە اشتىق بالالارعا تونەتىن قاۋىپ-قاتەردى ارتتىرىپ وتىرعانىن ەسكەرتتى. تەكسەرۋدەن وتكەن شامامەن 2,9 مىڭ قونىس اۋدارعان بالانىڭ 25 پايىزدان استامى قاتتى اشىعۋدان جانە دۇرىس تاماقتانباۋدان زارداپ شەگەدى، ولاردىڭ 200 گە جۋىعىنىڭ جاعدايى اۋىر.
بۇعان دەيىن حۋسيتتەر ساۋد ارابياسىنىڭ يەمەنگە 28 رەت اۋە سوققىسىن جاساعانىن مالىمدەگەن بولاتىن.
سونىمەن قاتار ساۋد ارابياسى حۋسيتتەرمەن قاقتىعىس ۋشىققان تۇستا اسكەري دايىندىعىن كۇشەيتىپ جاتىر.
حۋسيتتەر تاراپىنان شيەلەنىستىڭ كۇشەيۋىنە بايلانىستى يەمەن وكىلدەر پالاتاسى جالپى موبيليزاتسيا جاريالاۋ تۋرالى شەشىمدى ماقۇلدادى.
