ساۋد ارابياسى ەلدىڭ شىعىسىندا تاعى ءبىر دروندى قاعىپ تۇسىرگەنىن مالىمدەدى
استانا. KAZINFORM - يەمەننىڭ زاڭدى ۇكىمەتىن قولدايتىن ساۋد ارابياسى باستاعان اراب كواليتسياسى ەلدىڭ شىعىس بولىگىندە تاعى ءبىر ۇشقىشسىز ۇشۋ اپپاراتىنىڭ (درون) جولىن كەسكەنىن حابارلادى، دەپ جازادى انادولى.
كواليتسيا وكىلى، بريگادالىق گەنەرال تۋركي ءال-ماليكي امەريكالىق X الەۋمەتتىك جەلىسىندەگى پاراقشاسىندا تاعى ءبىر دروننىڭ ساۋد ارابياسىنىڭ شىعىس ايماعىنا باعىتتالعانىن مالىمدەدى.
ءال-ماليكيدىڭ ايتۋىنشا، ۇشىرىلعان جەرى بەلگىسىز درون اۋەدە قاعىپ ءتۇسىرىلىپ، جويىلعان.
وقيعا سالدارىنان قازا تاپقاندار مەن زارداپ شەككەندەر بار-جوعى، سونداي-اق ماتەريالدىق شىعىن تۋرالى اقپارات بەرىلگەن جوق.
بۇعان دەيىن كواليتسيا وكىلى ەلدىڭ شىعىس بولىگىنە باعىتتالعان ەكى دروننىڭ جانە ساۋد ارابياسىنىڭ استاناسى ەر-ريادقا قاراي ۇشىرىلعان حۋسيتتەردىڭ ەكى بالليستيكالىق زىمىرانىنىڭ جولى كەسىلگەنىن حابارلاعان ەدى.
يەمەندە 2014-جىلدىڭ قىركۇيەگىندە يران قولدايتىن حۋسيتتەر ەل استاناسى سانا مەن ءبىرقاتار پروۆينتسيانى باقىلاۋىنا العاننان كەيىن باستالعان ازاماتتىق سوعىس ءالى جالعاسىپ جاتىر.
2015-جىلدىڭ ناۋرىزىنان بەرى ساۋد ارابياسى باستاعان اراب كواليتسياسى حالىقارالىق قاۋىمداستىق مويىنداعان يەمەن ۇكىمەتىنە قولداۋ كورسەتىپ كەلەدى.
سوڭعى ۋاقىتتا يەمەندەگى ۇكىمەت كۇشتەرى مەن حۋسيتتەر اراسىنداعى قاقتىعىستار جيىلەگەن. يران قولدايتىن حۋسيتتەر وزدەرىنە شابۋىل جاسالىپ جاتقانىن ايتىپ، ساۋد ارابياسىنا بالليستيكالىق زىمىراندار مەن دروندار ارقىلى سوققى بەرىپ كەلەدى.
بۇدان بۇرىن حۋسيتتەر ساۋد ارابياسىنداعى ەر-رياد اۋەجايى مەن مۇناي قۇبىرىنا شابۋىل جاسالعانىن مالىمدەدى.