ساۋد ارابياسى، پاكىستان جانە تۇركيا اسكەري ىنتىماقتاستىقتى كۇشەيتەدى
استانا. KAZINFORM - ساۋد ارابياسى، پاكىستان جانە تۇركيانىڭ اسكەري باسشىلىعى بىرلەسكەن قورعانىس جونىندەگى مەككە كەلىسىمى اياسىنداعى مىندەتتەمەلەردى ورىنداۋ جانە اسكەري ىنتىماقتاستىقتى ودان ءارى نىعايتۋ قاجەتتىگىن مالىمدەدى، دەپ حابارلايدى Tasnim.
ەر-ريادتا ءۇش ەلدىڭ اسكەري باسشىلىعىنىڭ كەزدەسۋى ءوتتى. تاراپتار قاۋىپسىزدىك سالاسىنداعى جاعدايدى جانە ساۋد ارابياسى تاپ بولىپ وتىرعان قاتەرلەردى تالقىلادى.
اگەنتتىك پاكىستان ارمياسىنىڭ مالىمدەمەسىنە سىلتەمە جاساپ حابارلاعانداي، كەزدەسۋ قاتىسۋشىلارى «انسار اللاح» قوزعالىسىنىڭ ساۋد ارابياسىنا، سونىڭ ىشىندە ەكونوميكالىق ينفراقۇرىلىم نىساندارىنا جاساعان شابۋىلدارىن ايىپتادى.
اسكەري وكىلدەر سونداي-اق ءۇش ەلدىڭ قارۋلى كۇشتەرى اراسىنداعى ءوزارا ءىس- قيمىلدى كەڭەيتۋ، اقپارات الماسۋ، ۇيلەستىرۋدى كۇشەيتۋ جانە اسكەري مۇمكىندىكتەردى ينتەگراتسيالاۋ ماسەلەلەرىن قاراستىردى.
Tasnim مالىمەتىنشە، بۇل شارالار تەجەۋ الەۋەتىن جانە ۇجىمدىق قورعانىس تەتىكتەرىن نىعايتۋعا باعىتتالعان.
كەزدەسۋگە قاتىسۋشىلار ساۋد ارابياسىنىڭ قاۋىپسىزدىگىن، ەگەمەندىگى مەن اۋماقتىق تۇتاستىعىن قورعاۋعا بەيىلدى ەكەنىن دە راستادى.
ايتا كەتەيىك، بۇعان دەيىن ساۋد ارابياسى، تۇركيا جانە پاكىستاننىڭ باس شتاب باستىقتارى مەككە كەلىسىمى اياسىندا ەر-ريادتى قولداۋ ماسەلەسىن تالقىلايتىنى حابارلانعان ەدى.
