سۋ تاسقىنىنان زارداپ شەككەندەر ءوتىنىشتى قالاي بەرە الادى؟
استانا. KAZINFORM - بۇگىندە سۋ تاسقىنىنان زارداپ شەككەن تۇرعىندار وتەماقى الۋ ءۇشىن eGov mobile قوسىمشاسى ارقىلى ءوتىنىش بەرە الادى.
بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى رەسمي وكىلى البينا اتەن ايتتى.
«مينيسترلىك eGov mobile موبيلدى قوسىمشاسىندا سۋ تاسقىنى سالدارىنان كەلتىرىلگەن ماتەريالدىق شىعىندى وتەۋ تۋرالى وتىنىشتەردى قابىلداۋعا ارنالعان سەرۆيستى ىسكە قوستى. قىزمەت سۋ تاسقىنىنان زارداپ شەككەن اقمولا، قوستاناي، اتىراۋ، باتىس قازاقستان جانە سولتۇستىك قازاقستان وبلىستارىنداعى بارلىق ازاماتقا قولجەتىمدى. ەندى قازاقستاندىقتار eGov mobile موبيلدى قوسىمشاسى ارقىلى شىعىندى وتەۋ تۋرالى ارىزدى تىكەلەي بەرە الادى»، - دەدى البينا اتەن و ك ق- دە وتكەن بريفينگتە.
رەسمي وكىل سۋ تاسقىنى بولىپ جاتقان وڭىرلەردەگى جاعدايدى ونلاين باقىلاۋعا بولاتىنىن جەتكىزدى.
«سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسيننىڭ باستاماسىمەن Sergek Group كومپانياسىمەن بىرلەسىپ، Gov.kz سايتىندا سۋ تاسقىنىنا قارسى ءىس-شارالادى كورسەتەتىن ونلاين-ترانسلياتسيانى ىسكە قوستى.
ەندى ءاربىر ازامات ونلاين-ترانسلياتسيانى پايدالانىپ، ورال، اتىراۋ، قوستاناي قالالارىنداعى جاعدايدى كورىپ، سۋ تاسقىنىنا قارسى قانداي جۇمىس ىستەلىپ جاتقانىن بىلە الادى»، - دەدى ول.
