سۋ تاسقىنىنان رەسپۋبليكالىق جولدارعا 8,5 ميلليارد تەڭگە شىعىن كەلدى - كولىك ءمينيسترى

استانا. KAZINFORM - كوكتەمدە سۋ شايعان رەسپۋبليكالىق جانە جەرگىلىكتى جولدار قايتا قالپىنا كەلتىرىلىپ جاتىر. بۇل تۋرالى كولىك ءمينيسترى مارات قارابايەۆ ايتىپ بەردى.

«تاسقىننان كەيىن جول ۋچاسكەلەرى مەن قۇرىلىستارىن قالپىنا كەلتىرۋ جۇمىستارى جالعاسىپ جاتىر. رەسپۋبليكالىق جولدار بويىنشا 122 ۋچاسكەنى سۋ شايدى، ودان كەلگەن شىعىن 8 ميلليارد 500 ميلليون تەڭگەنى قۇرادى. قالپىنا كەلتىرۋ جۇمىستارىنا تولىق كولەمدە قارجى ءبولۋ كوزدەلگەن. بۇگىندە رەسپۋبليكالىق بيۋدجەت ەسەبىنەن 102 ۋچاسكەدە جۇمىستار تولىعىمەن اياقتالدى، ال قالعان 20 ۋچاسكەنى قالپىنا كەلتىرۋ قازاقستان دامۋ بانكىنىڭ قاراجاتى ەسەبىنەن جۇرگىزىلۋدە. جول قۇرىلىستارى مەرزىمىندە اياقتالادى»، - دەدى مارات قارابايەۆ ۇكىمەت وتىرىسىندا.

ودان ءارى مينيستر 10 وڭىردە جەرگىلىكتى جولداردى سۋ شايىپ، بۇزىلعانىن ءمالىم ەتتى.

«بارلىعى سۋ باسقان 414 ۋچاسكە انىقتالدى، وعان جەرگىلىكتى بيۋدجەت ەسەبىنەن قارجى ءبولىنىپ، 233 ۋچاسكەدە قالپىنا كەلتىرۋ جۇمىستارى تولىق اياقتالدى. جالپى تاسقىن كەزىندە 30 مىڭعا جۋىق جولاۋشى ءقاۋىپسىز جەرگە جەتكىزىلدى. سونداي- اق، توپان سۋ باسقان وڭىرلەرگە 10 مىڭ توننادان استام گۋمانيتارلىق كومەك جەتكىزىلدى»، - دەيدى ۆەدومستۆو باسشىسى.

ايتا كەتەيىك، 2025 -جىلى ەل اۋماعىندا تاسقىندى بولجاۋ جانە مودەلدەۋ اقپاراتتىق جۇيەسىن ەنگىزۋ جوسپارلانىپ وتىر.