سۋ تاسقىنىنان كەيىن 5,8 مىڭنان استام قازاقستاندىق وتباسى مەملەكەتتىك قولداۋ الدى
استانا. KAZINFORM – ق ر ۇكىمەتى مەملەكەت باسشىسى قاسىم- جومارت توقايەۆتىڭ تاپسىرماسى بويىنشا جويقىن سۋ تاسقىنى سالدارىنان زارداپ شەككەن ازاماتتارعا كەلتىرىلگەن زالالدى باعالاۋ جانە وتەۋ بويىنشا جۇمىستار جۇرگىزۋدە.
بۇگىندە ارنايى قۇرىلعان وڭىرلىك كوميسسيالارعا اقمولا، اقتوبە، اتىراۋ، باتىس قازاقستان، قاراعاندى، قوستاناي، پاۆلودار، سولتۇستىك قازاقستان، اباي جانە ۇلىتاۋ وبلىستارىنىڭ تۇرعىندارىنان 13577 ءوتىنىش كەلىپ تۇسكەن.
5803 وتباسى 100 ا ە ك نەمەسە 369200 تەڭگە كولەمىندە جالپى سوماسى 2 ميلليارد تەڭگەدەن استام ءبىرجولعى تولەم الدى. 877 وتباسىعا كەلتىرىلگەن ماتەريالدىق شىعىن ءۇشىن جالپى سوماسى 380 ميلليون تەڭگە وتەماقى تولەندى. مال شىعىنى ءۇشىن بەرىلگەن وتەماقىنىڭ جالپى سوماسى 38,9 ميلليون تەڭگەگە جەتتى.
اعىمداعى جىلدىڭ 18-ساۋىرىندەگى جاعداي بويىنشا، زارداپ شەككەن وڭىرلەردە 2602 تۇرعىن ءۇي تەكسەرىلىپ، ولاردىڭ 1499 ىنا باعالاۋ جۇرگىزىلدى. ناتيجەسىندە 794 ءۇي جوندەۋگە كەلەتىنى، 701 باسپانانىڭ قالپىنا كەلتىرۋگە جارامسىز ەكەنى انىقتالدى. قازىرگى ۋاقىتتا 197 وتباسىعا باسپانالارىن جوندەۋ ءۇشىن جالپى سوماسى 218,6 ميلليون تەڭگە وتەماقى تولەندى. 33 وتباسىعا قيراعان ءۇيدىڭ ورنىنا جاڭا باسپانا جانە پاتەرلەر بەرىلدى.
پاۆلودار، قاراعاندى جانە اقتوبە وبلىستارىندا تۇرعىن ۇيلەردىڭ قۇرىلىسى باستالدى.
باعالاۋ جانە زالالدى وتەۋ بويىنشا ءتيىستى جۇمىستار جالعاسۋدا. ق ر پرەزيدەنتى اتاپ وتكەندەي، بارلىق زارداپ شەككەن ازاماتتارعا مەملەكەت تاراپىنان جان-جاقتى قولداۋ كورسەتىلەدى.
«ۇكىمەت زارداپ شەككەن ازاماتتاردىڭ بارلىعىنا قولداۋ كورسەتەدى. ءبىز سۋ تاسقىنى سالدارىنان بولعان بارلىق شىعىندى وتەيمىز. ءاربىر ازامات، ءاربىر وتباسى مەملەكەتتىڭ قامقورلىعىندا بولادى. بۇل - مەن ءۇشىن باستى مىندەت»، - دەدى قاسىم- جومارت توقايەۆ سولتۇستىك قازاقستان وبلىسىنىڭ ەۆاكۋاتسيالانعان تۇرعىندارىمەن كەزدەسۋىندە.
ەسكە سالا كەتەيىك، بۇعان دەيىن سۋ تاسقىنى سالدارىنان كەلگەن زالالعا وتەماقى الۋ ءۇشىن ءىس- قيمىل الگوريتمى جاريالانعان بولاتىن.
