سۋ تاسقىنىنان 270 ادام قازا تاپتى

افريكا مۇيىسىندە توقتاۋسىز جاۋىپ جاتقان جاڭبىر سۋ تاسقىنىنا ۇلاسىپ، 270 كە جۋىق ادام قازا تاپتى، 900 دەن استام ادام ءۇيىن تاستاپ كەتۋگە ءماجبۇر بولدى.

بۇل تۋرالى دامۋ ماسەلەلەرى بويىنشا ۇكىمەتارالىق ورگان جانىنداعى /ICPAC/ كليماتتىق بولجامدار جانە كليمات دەرەكتەرىن قولدانۋ ورتالىعىنا سىلتەمە جاساپ شينحۋا ءمالىم ەتتى، دەپ حابارلايدى Kazinform.

مالىمدەمەدە جايسىز اۋا رايىنان ەفيوپيا، كەنيا مەن سومالي قاتتى زارداپ شەكتى. كەيىنگى ەكى ەلدە جاۋىن-شاشىن ءبىر ايدان بەرى توقتاماي جاتىر.

«افريكا ءمۇيىسى قازىرگى ۋاقىتتا ەل-نينو تۋدىرعان جاۋىن-شاشىن مەن سۋ تاسقىنىنان زارداپ شەگىپ وتىر. بۇل جاعداي ادامدار مەن جانۋارلاردىڭ ولىمىنە جانە سومالي، كەنيا مەن ەفيوپيا تۇرعىندارىنىڭ جاپپاي كوشۋىنە اكەپ سوقتى»، - دەپ حابارلادى ICPAC.

جەرگىلىكتى بيلىك وكىلدەرى سوماليدە اۋا رايى سالدارىنان 100 ادام، كەنيادا – 120، ەفيوپيادا 46 تۇرعىن مەرت بولعانىن ءمالىم ەتتى.

تۇرعىندارى كوبىرەك كوشكەن ءوڭىر سومالي بولىپ تۇر. وندا 700 مىڭ ادام ءۇيىن تاستاپ كەتتى. كەنيادا 136 مىڭ ادام جانە ەفيوپيادا 50 مىڭعا جۋىق تۇرعىن باس ساۋعالاۋعا ءماجبۇر بولدى.

ICPAC باعالاۋىنشا، سۋ تاسقانىنان سوماليدە 1,5 ميلليوننان استام ادام، كەنيادا 950 مىڭنان استام، ەفيوپيادا 101 مىڭنان استام تۇرعىن زارداپ شەكتى.