سۋ تاسقىنىنا قارسى ءىس-شارالارعا 50 مىڭنان استام ۆولونتەر جۇمىلدىرىلدى

волонтеры
فوتو: اقمولا وبلىسىنىڭ پوليتسيا باسقارماسى

استانا. KAZINFORM - مۇنداي مالىمەتتى ق ر مادەنيەت جانە اقپارات مينيسترلىگى تاراتتى.

مينيسترلىكتىڭ باسپا ءسوز قىزمەتى تاراتقان اقپاراتتارعا قاراعاندا، ۆولونتەرلەر تۇرعىنداردى ەۆاكۋاتسيالاۋعا اتسالىسىپ، قۇتقارىلعان ادامدارعا العاشقى مەديتسينالىق، پسيحولوگيالىق كومەك كورسەتەدى، گۋمانيتارلىق كومەكتى جيناپ سۇرىپتايدى، جان-جاققا جونەلتىپ، ارىق قازىپ، بوگەتتەردى كۇشەيتەدى. قاجەت بولعان جاعدايدا قۇتقارۋ جانە اسكەري قۇرىلىم قىزمەتكەرلەرىنە ىستىق تاماق ۇيىمداستىرادى.

بۇگىنگى تاڭدا ۆولونتەرلەر شامامەن 9903 توننا گۋمانيتارلىق كومەك جينادى، ونىڭ 6326 تونناسى س تاسقىنىنان ەرەكشە زارداپ شەككەن ايماقتارعا جەتكىزىلدى جانە تاراتىلدى.

اقتوبە وبلىسىندا ازاماتتاردى ەۆاكۋاتسيالاۋعا جانە گۋمانيتارلىق كومەك پۋنكتتەرىندەگى جۇمىسقا 8600 دەن استام ۆولونتەر جۇمىلدى. ەكى گۋمانيتارلىق كومەك پۋنكتىندە 860 توننا گۋمانيتارلىق كومەك جينالدى. ۆولونتەرلەر كۇش- جىگەرىنىڭ ارقاسىندا 10000 قۇتقارۋشى مەن ەۆاكۋاتسيالانعان تۇرعىنعا ىستىق تاماق ۇيىمداستىرىلدى.

باتىس قازاقستان وبلىسىندا سۋ تاسقىنىنا قارسى ءىس-شارالاردا 8 مىڭنان استام ۆولونتەر جۇمىس ىستەيدى، گۋمانيتارلىق كومەك جيناۋ پۋنكتتەرىندە 780 توننادان استام گۋمانيتارلىق كومەك جينالدى. 4 مىڭنان استام ۆولونتەر قالانىڭ ءارتۇرلى اۋداندارىندا قاپتارعا قۇم تولتىرىپ، بوگەتتەر سالىپ، سۋدان قورعانۋ شارالارىمەن اينالىسىپ جاتىر.

قوستاناي وبلىسىندا 10000 نان استام ۆولونتەر جۇمىلدىرىلىپ، 550 توننادان استام ازىق-تۇلىك، 720 توننا ازىق-تۇلىككە جاتپايتىن قاجەتتى تاۋارلار جينالدى.

اتىراۋ وبلىسىندا سۋ تاسقىنىنا قارسى ءىس-شارالارعا 13 مىڭنان استام ۆولونتەر تارتىلدى، گۋمانيتارلىق كومەك جيناۋ پۋنكتتەرىندە 1890 توننا تاۋارلار مەن زاتتار جينالدى.

اتىراۋ قالاسىندا بوگەتتەردى كۇشەيتۋ ءۇشىن 107 پۋنكت ورناتىلدى، ءالى دە بوگەتتەر سالىنىپ جاتىر. ينفراقۇرىلىمدىق وبەكتىلەردى قورعاۋعا ەرەكشە كوڭىل بولىنگەن.

سولتۇستىك قازاقستان وبلىسىندا 530 توننادان استام گۋمانيتارلىق كومەك جينالدى، تۇركىستان وبلىسىندا 18 ۆولونتەرلەر شتابى قۇرىلدى، زارداپ شەككەن وڭىرلەرگە 950 توننا گۋمانيتارلىق كومەك جىبەرىلدى.

«استانا قالاسىنىڭ 30 ۆولونتەرلىك ۇيىمى 1120 توننا ازىق-تۇلىك جانە ازىق-تۇلىككە جاتپايتىن قاجەتتى تاۋارلاردى جيناپ بەردى»، - دەلىنگەن ق ر مادەنيەت جانە اقپارات مينيسترلىگىنىڭ باسپا ءسوز قىزمەتى تاراتقان اقپاراتتا.

سوڭعى جاڭالىقتار