سۋ تاسقىنىمەن كۇرەس جۇمىستارىن اتقارعان اسكەري قىزمەتشىلەر ماراپاتتالدى
استانا. KAZINFORM - مەملەكەت باسشىسىنىڭ جارلىعىمەن قارعىن سۋعا قارسى شارالار كەزىندە كورسەتكەن قاجىرلى ەڭبەگى مەن جانقيارلىعى ءۇشىن قارۋلى كۇشتەردىڭ اسكەري قىزمەتشىلەرى جوعارى مەملەكەتتىك ناگرادالار - Ⅱ دارەجەلى «ايبىن» وردەنى جانە «جاۋىنگەرلىك ەرلىگى ءۇشىن» مەدالىمەن ماراپاتتالدى. بۇل تۋرالى قورعانىس مينيسترلىگىنىڭ باسپا ءسوز قىزمەتى حابارلادى.
اقوردادا پرەزيدەنت قاسىم- جومارت توقايەۆ 99250 اسكەري ءبولىمىنىڭ كومانديرى پولكوۆنيك راسۋل زاكىروۆكە Ⅱ دارەجەلى «ايبىن» وردەنىن تابىس ەتتى. ونىڭ باسشىلىعىمەن باتىس قازاقستان وبلىسىنىڭ اۋماقتىق قورعانىس بريگاداسى ەلدى مەكەندەردى امان الىپ قالۋعا اتسالىستى. تاۋلىك بويى اتقارىلىپ جاتقان جۇمىستار ۇيىمداستىرۋدى جانە جەكە قۇرامنىڭ قاۋىپسىزدىگىن قامتاماسىز ەتۋدى تالاپ ەتتى.
قارۋلى كۇشتەردىڭ ۇشۋ قۇرامى دا اپاتتى جاعدايدا زور ەڭبەك ەتتى. اۋە قورعانىسى كۇشتەرى اسكەري ينستيتۋتى باستىعىنىڭ ورىنباسارى پولكوۆنيك امانگەلدى ماقىشيەۆتىڭ باسشىلىعىمەن م ي-8 تىكۇشاعىنىڭ ەكيپاجى باتىس قازاقستان وبلىسىندا جەرگىلىكتى حالىقتى ىزدەۋمەن، قۇتقارۋمەن جانە ولاردى ەۆاكۋاتسيالاۋمەن اينالىستى.
وسىنداي شارالارعا استانا قالاسىنداعى 19132 -جىلى اسكەري ءبولىمى جاۋىنگەرلىك دايارلىق ءبولىمى ۇشۋدى باسقارۋ توبىنىڭ باستىعى پودپولكوۆنيك ميرشات ساعىندىقوۆ جانە اۋە قورعانىسى كۇشتەرى اسكەري ينستيتۋتى كۋرسانتتار باتالونىنىڭ كومانديرى پودپولكوۆنيك اسحات شافيەۆ تا قاتىستى.
سۋدان وتكەل جاساۋدى ۇيىمداستىرۋ بارىسىندا قونايەۆ قالاسىنداعى 58012 اسكەري ءبولىمىنىڭ پونتون-كوپىر باتالونى ۆزۆودىنىڭ كومانديرى 3-سىنىپتى سەرجانت زاحيدجان كاريموۆ تا ەڭبەگىمەن كوزگە ءتۇستى. باتىس قازاقستان وبلىسىندا جاعالاۋدى كۇشەيتۋ جۇمىستارىن جۇرگىزۋ كەزىندە 18404 اسكەري ءبولىمى دەسانتتىق-شابۋىلداۋ باتالونىنىڭ جاۋىنگەرلىك جانە دەنە دايىندىعى جونىندەگى نۇسقاۋشىسى 3-سىنىپتى سەرجانت امانگەلدى بازاربايەۆ قاجىرلى قىزمەت ەتتى.
مەملەكەت باسشىسى اقوردادا ولاردىڭ جانقيارلىق ەڭبەگىن ەلەپ، «جاۋىنگەرلىك ەرلىگى ءۇشىن» مەدالىمەن ماراپاتتادى.
توعىز اسكەري قىزمەتشىگە مەملەكەتتىك ناگرادالار سالتاناتتى تۇردە قىزمەت ورنىندا تابىس ەتىلەتىن بولادى. II دارەجەلى «ايبىن» وردەنىنە اسكەري-اۋە كۇشتەرى قولباسشىسىنىڭ باسقارماسى جاۋىنگەرلىك دايارلىق باسقارماسىنىڭ اعا ينسپەكتور - ۇشقىشى پولكوۆنيك قايرات تۇگەلوۆ لايىق دەپ تانىلدى.
اۋە قورعانىسى كۇشتەرى اسكەري ينستيتۋتى وقۋ اۆياتسيالىق ورتالىعى ەسكادريلياسىنىڭ بۋىن كومانديرى جانە كومانديردىڭ ورىنباسارى مايورلار جانىبەك بەكباۋليەۆ پەن بيبارىس ىبىرايەۆ، 19132 اسكەري ءبولىمى اۆياتسيالىق ەسكادريلياسىنىڭ شتۋرمانى مايور اسحات سەيىلوۆ، «باتىس» وڭىرلىك قولباسشىلىعى اسكەرلەرى قولباسشىسى باسقارماسىنىڭ شتابى ينجەنەرلىك اسكەرلەر ءبولىمىنىڭ اعا وفيتسەرى پودپولكوۆنيك تيمۋر زاكىروۆ، 30238 اسكەري ءبولىمى كومانديرىنىڭ ورىنباسارى پودپولكوۆنيك ساكەن شۇعانوۆ، 35748 اسكەري ءبولىمى روتا كومانديرىنىڭ ورىنباسارى اعا لەيتەنانت جاسۇلان بىرىبايەۆ، 31775 اسكەري ءبولىمىنىڭ اعا مامانى ەفرەيتور اسان تىلەۋباي، اسكەري-اۋە كۇشتەرى قولباسشىسىنىڭ باسقارماسى جاۋىنگەرلىك دايارلىق باسقارماسىنىڭ اعا ينسپەكتور - ۇشقىشى پولكوۆنيك ۆلاديمير سەمەنوۆ «جاۋىنگەرلىك ەرلىگى ءۇشىن» مەدالىمەن ماراپاتتالدى.
ەستەرىڭىزگە سالا كەتسەك، قارۋلى كۇشتەردىڭ اسكەري قىزمەتشىلەرى اقتوبە، اتىراۋ، باتىس قازاقستان، اقمولا، قوستاناي، سولتۇستىك قازاقستان، قاراعاندى، شىعىس قازاقستان وبلىستارىنا جانە اباي وبلىستارىنداعى قارعىن سۋدى جويۋعا جۇمىلدىرىلعان بولاتىن. ەكى ايدىڭ ىشىندە ولاردىڭ كۇش- قۇرالدارىمەن وزەندەردىڭ جاعالاۋى كۇشەيتىلىپ، 183 شاقىرىم بوگەتتەر نىعايتىلدى. شامامەن 3,5 ميلليون قاپ قۇم تولتىرىلىپ، جالپى اۋدانى 766 گ ا وبەكتىلەرگە دەزينفەكتسيا جۇرگىزىلدى، ارميالىق اۆياتسيا تىكۇشاقتارىنىڭ ەكيپاجدارى 3,5 مىڭنان اسا ازاماتتى ەۆاكۋاتسيالادى، ال ۇشاق ەكيپاجدارى 280 تونناعا جۋىق جۇك جەتكىزدى.
