سۋ تاسقىنى: ولگەن مالعا قانشا تەڭگەدەن تولەنەدى
استانا. KAZINFORM - ەلىمىزدە سۋ تاسقىنىنان ارام قاتقان ءتورت تۇلىكتىڭ شىعىنى ەسەپتەلىپ، مال يەلەرىنە وتەماقى ۇلەستىرىلە باستادى.
قوستاناي وبلىسى - مال شىعىنى قۇنىن وتەۋدى جۇزەگە اسىرعان رەسپۋبليكاداعى العاشقى وبلىستاردىڭ ءبىرى. بۇل باعىتتاعى جۇمىستاردىڭ ءمان- جايىن ءبىلۋ ءۇشىن وبلىستىق ۆەتەريناريا باسقارماسى باسشىسىنىڭ مىندەتىن اتقارۋشى باۋىرجان بەكەتكە حابارلاستىق.
«وبلىس بويىنشا سۋ تاسقىنى سالدارىنان 981 باس ءتورت تۇلىك ارام قاتتى. قازىرگى تاڭدا 780 باس مالدىڭ باعالاۋ ەسەپتەرى دايىندالىپ، يەلەرىنە 113 ميلليون تەڭگەدەن استام قاراجات تولەندى. ءتورت تۇلىكتىڭ قۇنى نارىقتاعى باعامەن ەسەپتەلەدى. بۇل جۇمىستاردى «STELLA +» باعالاۋشى ۇيىمى جۇرگىزىپ جاتىر»، - دەدى ول اگەنتتىك تىلشىسىنە بەرگەن جاۋابىندا.
ىلە- شالا «STELLA+» ج ش س باسشىسى ۆيكتور شيەۆچەنكوعا حابارلاستىق. ونىڭ ايتۋىنشا، باعالاۋ كەزىندە ءار تۇلىكتىڭ جاسىنا ءمان بەرىلەدى.
«ولگەن مالدىڭ سالماعىن انىقتاۋ مۇمكىن ەمەس ەكەنى بەلگىلى. ءبىز «ەگەر توتەنشە جاعداي بولماسا، مال يەسى تۇلىگىن قانشا تەڭگەگە ساتا الار ەدى؟» دەگەن ساۋالعا جاۋاپ ىزدەپ، نارىقتى زەرتتەدىك. ءسويتىپ، ءار مالدىڭ قۇنىن شىعاردىق»، - دەيدى سەرىكتەستىك باسشىسى.
بۇدان كەيىن اقتوبە، اتىراۋ جانە باتىس پەن سولتۇستىك قازاقستان وبلىستارىنىڭ قۇزىرلى ورگاندارىنا حابارلاستىق. اقتوبە مەن باتىس قازاقستان وبلىسىندا باعا قوستانايمەن شامالاس بولىپ شىقتى. سونىمەن، ولگەن مالدىڭ قۇنى قانشا؟
ال اتىراۋ مەن سولتۇستىك قازاقستان وبلىسىندا باعا ازىرگە ناقتىلانباعان. جەرگىلىكتى ورگاندار سۋ تاسقىنى ءالى اياقتالماعاندىقتان، ولگەن مالدىڭ ەسەبىن جۇرگىزۋگە كىرىسپەگەندىكتەرىن ءمالىم ەتتى.
ايتا كەتەيىك، تولەمدەر اۋىل شارۋاشىلىعى مينيسترلىگى ازىرلەگەن سۋ تاسقىنىنان شىعىن بولعان اۋىل شارۋاشىلىعى جانۋارلارىنىڭ قۇنىن وتەۋ جونىندەگى الگوريتمگە سايكەس جۇزەگە اسىرىلادى. وعان سايكەس، مال «اۋىل شارۋاشىلىعى جانۋارلارىن بىردەيلەندىرۋ» بازاسىندا تىركەلسە، بيۋدجەت ەسەبىنەن قارجىلاندىرىلادى.
ال، مالدىڭ ولەكسەسى تابىلماسا، دالەلدەۋ ءۇشىن 3 كۋاگەر تارتىلادى. تۇلىكتىڭ شىعىنى سۋ تاسقىنىنان بولعانى تۋرالى كوميسسيالىق اكتى جانە ۋتيليزاتسيا تۋرالى اكتى جاسالادى. مۇنداي جاعدايدا شىعىن دەمەۋشىلەر ەسەبىنەن قالپىنا كەلتىرىلمەك. سونداي-اق مال ولەكسەسىنىڭ قۇلاعىندا سىرعاسى بولماسا نەمەسە مال ولەكسەسى تابىلماسا، «اۋىل شارۋاشىلىعى جانۋارلارىن بىردەيلەندىرۋ» بازاسىندا تىركەلمەسە دەمەۋشىلەر ەسەبىنەن قارجىلاندىرىلادى.
