سۋ تاسقىنى سالدارىن جويۋدا ناقتى ءىس-شارالار جۇزەگە اسىرىلىپ جاتىر - ماۋلەن اشىمبايەۆ

استانا. KAZINFORM - سەنات ءتوراعاسى ماۋلەن اشىمبايەۆ سۋ تاسقىنىنان كەيىنگى سىن-ساعاتتا بۇكىل ەل بولىپ جۇمىلۋ اسا ماڭىزدى ەكەنىن ايتتى.

«ءبىزدىڭ ارىپتەستەر (پارلامەنت دەپۋتاتتارى) وڭىرلەرگە بارىپ، جەرگىلىكتى اتقارۋشى ورگاندارعا وزدەرىنىڭ كومەكتەرىن جاسادى. حالىقپەن بىرگە وسى قيىن جاعدايدى ەڭسەرۋگە ءوز ۇلەستەرىن قوسىپ وتىر. قازىر ءبىراز ارىپتەستەرىمىز وڭىردە ءجۇر، سونداي-اق باسقا دا سەناتورلار جاقىندا وبلىستارعا بارادى. سۋ تاسقىنىنا قاتىستى بارلىق ماسەلە پرەزيدەنت قاسىم-جومارت توقايەۆتىڭ باقىلاۋىندا تۇر. مەملەكەت باسشىسى سۋ باسۋدان زارداپ شەككەندەرگە ءتيىستى ماتەريالدىق، قارجىلىق كومەك جاسالاتىنىن ايتقان ەدى. سول سەبەپتى ۇكىمەت بۇل باعىتتا ناقتى ءىس-شارالاردى جۇزەگە اسىرىپ جاتىر»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ پايىمىنشا، قازىرگى كەزدە ەلىمىزدە شىدامدىلىق، سابىرلىق تانىتۋ كەرەك.

«جالپى، قازىر ءبارىمىز - بەلسەندى ازاماتتار مەن ازاماتتىق قوعام ينستيتۋتتارى، دەپۋتاتتار، ۇكىمەت مۇشەلەرى، اكىمدەر، سونداي-اق پارتيالار وسى سىن ساعاتتا بىرلىگىمىزدى تانىتىپ، تابيعي اپتاتتىڭ سالدارىمەن كۇرەسۋىمىز كەرەك. كۇشىمىزدى بىرىكتىرىپ ارەكەت ەتسەك، بۇل قيىندىقتى ەڭسەرەتىنىمىز انىق. سوندىقتان زارداپ شەككەن ەلدى مەكەندەردىڭ حالقىمەن بىرگە ءتيىستى ارەكەتتەردى جۇزەگە اسىرىپ جاتىرمىز»، - دەدى سەنات ءتوراعاسى.