سۋ تاسقىنى: رەسپۋبليكا بويىنشا قانشا ادام ۇيىنە ورالعانى بەلگىلى بولدى

استانا. KAZINFORM - جايىق وزەنى سۋ دەڭگەيىنىڭ بىرتىندەپ تومەندەپ كەلە جاتقانى بايقالادى. بۇل تۋرالى ت ج م وكىلى اسقار ءشارىپ ايتتى.

«اتىراۋ، اقتوبە، باتىس قازاقستان جانە سولتۇستىك قازاقستان وبلىستارىندا سۋ تاسقىنىنا قارسى ءىس-شارالار، سۋ تاسقىنى سالدارىن جويۋ جانە حالىققا كومەك كورسەتۋ بويىنشا جۇمىستار جالعاسۋدا. باتىس قازاقستان وبلىسىندا، ورال قالاسىندا جايىق وزەنىنىڭ سۋ دەڭگەيى بىرتىندەپ تومەندەپ جاتقانى بايقالادى، سۋ دەڭگەيىنە مونيتورينگ جالعاسىپ جاتىر. قازىرگى ۋاقىتتا ۇيلەردى سۋ باسۋ وقيعاسى تىركەلگەن جوق. ساياجايدا قالىپ قويعان تۇرعىنداردىڭ بار- جوعىن تەكسەرۋ ءۇشىن ارالاۋ جۇمىسى ءالى دە جالعاسادى»، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ دەرەگىنشە، وسى ساعاتتا رەسپۋبليكا بويىنشا 31112 ادام ۇيلەرىنە ورالدى. 8566 ادام، ونىڭ ىشىندە 3718 بالا ەۆاكۋاتسيالاۋ پۋنكتتەرىندە قالىپ وتىر.

«5677 تۇرعىن ءۇي مەن 2584 اۋلا اۋماعىنان سۋدىڭ باعىتى بۇرىلىپ، سۋ سورىلدى. 11,7 ميلليون استام تەكشە مەتر ەرىگەن قار سۋى سورىپ شىعارىلدى، 5,5 ميلليون قاپشىق جانە 1,5 ملن استام توننا ينەرتتى ماتەريال توسەلدى. جەدەل جەلى تەلەفونىنا 2205 قوڭىراۋ ءتۇستى. اپاتتىق-قۇتقارۋ جانە سۋ تاسقىنىنا قارسى جۇمىستارعا 32 مىڭنان استام ادام، 4 مىڭ تەحنيكا، 773 سۋ سورۋ قۇرالى، 294 ءجۇزۋ قۇرالى، 13 اۋە كەمەسى جۇمىلدىرىلدى»، - دەدى اسقار ءشارىپ.

اۆتور
مارلان جيەمباي