سۋ تاسقىنى: قىرىلعان مال ءۇشىن وتەماقى قالاي تولەنەدى؟
استانا. قازاقپارات - بۇگىنگى تاڭدا 4,1 مىڭ باس ولگەن مالدار جويىلدى. سۋ تاسقىنى كەزىندەگى شىعىندى بارىنشا ازايتۋ بويىنشا قابىلدانعان شارالاردىڭ ناتيجەسىندە اۋىل شارۋاشىلىعى مينيسترلىگىنىڭ وبلىس اكىمدىكتەرىمەن بىرلەسكەن ارەكەتىمەن 88 مىڭنان استام اۋىل شارۋاشىلىعى جانۋارلارى قاۋىپسىز اۋماققا ايدالىپ شىعارىلدى.
جەدەل دەرەكتەر بويىنشا ولگەن مال سانى 8,1 مىڭ باستى قۇرايدى. ونىڭ ىشىندە ۇساق مال - 6 مىڭ، ءىرى قارا - 1,5 مىڭ، جىلقى - 514 باس. رەسپۋبليكالىق ەپيزووتياعا قارسى وترياد تۇراقتى ەپيزووتيالىق جاعدايدى ساقتاۋ ماقساتىندا جانۋارلاردىڭ ولەكسەلەرىن جويۋ جۇمىستارىن قارقىندى جالعاستىرۋدا. بۇل جايلى ق ر ا ش م رەسمي وكىلى ولجاس تىلەبالدين و ك ق الاڭىندا مالىمدەدى، دەپ حابارلادى turkystan.kz.
بۇگىنگى تاڭدا 4,1 مىڭ باس ولگەن مالدار جويىلدى. پرەمەر-ءمينيستردىڭ تاپسىرماسى بويىنشا بۇل جۇمىس كۇشەيتىلگەن رەجيمدە جالعاساتىن بولادى.
«سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زارداپتارىن جويۋ جونىندەگى رەسپۋبليكالىق شتابپەن ولگەن مال يەلەرىنە وتەماقى تولەۋ الگوريتمى ازىرلەنىپ، بەكىتىلدى. مەنشىك يەلەرى مەن زالالدى انىقتاۋ جانە باسقا دا ماسەلەلەردى شەشۋ ءۇشىن وڭىرلەردە جەرگىلىكتى اتقارۋشى ورگاندارمەن شىعىندى انىقتاۋ جونىندەگى كوميسسيالار قۇرىلدى. سۋ تاسقىنى سالدارىنان ولگەن اۋىل شارۋاشىلىعى جانۋارلارىنىڭ يەلەرى مالدارى تۋرالى مالىمەتتەردى كورسەتە وتىرىپ، جەرگىلىكتى كوميسسياعا ءوتىنىش بەرۋى كەرەك»، - دەدى سپيكەر.
اۋىل شارۋاشىلىعى جانۋارلارىنا مەنشىك قۇقىعى كوميسسيالاردىڭ اكتىلەرىمەن راستالادى. مەنشىك يەلەرىنە وتەماقى مولشەرى ۇلتتىق ستاتيستيكا بيۋروسى جاريالاعان جانۋارلاردىڭ تۇرلەرى، جىنىسى مەن جاس شاماسى بويىنشا نارىقتىق قۇنى تۋرالى مالىمەتتەر نەگىزىندە ايقىندالاتىن بولادى.
جالپى، سۋ تاسقىنىنان زارداپ شەككەن ايماقتارداعى ەپيزووتيالىق جاعداي، سونداي-اق اۋىل شارۋاشىلىعى جانۋارلارىنىڭ يەلەرىنە كەلتىرىلگەن شىعىندى وتەۋ ماسەلەلەرى قازاقستان رەسپۋبليكاسى اۋىل شارۋاشىلىعى مينيسترلىگىنىڭ تۇراقتى باقىلاۋىندا.
