سۋ تاسقىنى: قوستانايلىق كاسىپكەرلەر 4 ميلليارد 600 ميلليون تەڭگە شىعىنعا باتتى
استانا. KAZINFORM - قوستاناي وبلىسىندا سۋ تاسقىنان زاردارپ شەككەن كاسىپكەرلەردىڭ ەشقايسىسى نازاردان تىس قالمايدى. بۇل تۋرالى «ءبىز بىرگەمىز!» جالپى ۇلتتىق تەلەمارافونى بارىسىندا قوستاناي وبلىستىق كاسىپكەرلىك باسقارماسىنىڭ وكىلى تالعات سالاماتوۆ ايتتى.
«ەشقانداي كاسىپكەر نازاردان تىس قالمايدى. ەرەجەگە سايكەس، جىلجيتىن، جىلجىمايتىن مۇلىك، قۇرال-جابدىقتار جانە تاۋارلىق- ماتەريالدىق قۇندىلىقتار وتەلۋگە جاتادى. مۇلىكتىڭ زاقىمدانعانى جۇرگىزىلگەن باعالاۋ نەگىزىندە راستالادى. ال تاۋارلىق- ماتەريالدىق قۇندىلىقتار بويىنشا مەملەكەتتىك كىرىستەر ورگاندارىمەن بيزنەستىڭ اينالىمى جانە دەكلاراتسيا دەرەكتەرىنە سايكەس باعالاۋ جۇرگىزەمىز»، - دەدى تالعات سالاماتوۆ.
جالپى، قوستاناي وبلىسىندا 97 بيزنەس سۋبەكتىسى سۋ تاسقىنىنان زارداپ شەككەندەرىن ايتىپ وتىر. ولارعا كەلگەن شىعىن كولەمى 4 ميلليارد 600 ميلليون تەڭگەنى قۇرايدى. 97 سۋبەكتىنىڭ باسىم بولىگى ساۋدا-ساتتىقپەن اينالىساتىن شاعىن جانە ورتا بيزنەس وكىلدەرى. 2 ورتا جانە ءىرى بيزنەس سۋبەكتىسى بار. نەگىزىنەن قوستاناي قالاسى مەن قوستاناي اۋدانى كاسىپكەرلەرى قاتتى زارداپ شەككەن.
ايتا كەتەيىك، 10 رەسپۋبليكالىق ارنانىڭ تىكەلەي ەفيرىندە جالپىۇلتتىق تەلەمارافون ءوتىپ جاتىر.
Jibek Joly, Qazaqstan, «حابار»، «ەۋرازيا»، «ك ت ك»، «31-ارنا»، Atameken Business, Astana TV «7 ارنا» جانە Almaty TV تەلەارنالارىنىڭ 5 ساعاتتىق تىكەلەي ەفيرىندە تاسقىن باسقان اۋماقتى كوزبەن كورگەن، تابيعي اپاتتان زارداپ شەككەن تۇرعىنداردىڭ جان تەبىرەنتەر وقيعالارى ايتىلىپ، تابيعي اپات ايماقتارىنان رەپورتاجدار بەرىلۋدە.
