سۋ تاسقىنى: قازاقستانعا گۋمانيتارلىق كومەك كەرەك پە
استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ ەلىمىزدىڭ وڭىرلەرىندەگى سۋ تاسقىنىنان كەيىن كورشى مەملەكەتتەن كەلگەن گۋمانيتارلىق كومەككە قاتىستى تۇسىنىك بەردى.
«قازىرگى كەزدە قازاقستاننىڭ ءبىرقاتار وڭىرىندە سۋ تاسقىنى سالدارىنان قالىپتاسقان جاعدايعا بايلانىستى باۋىرلاس قىرعىز مەملەكەتى ءوز باستاماسىمەن كومەك جاسادى. وسىدان 2 كۇن بۇرىن قىرعىز رەسپۋبليكاسىنىڭ توتەنشە جاعداي مينيسترلىگى 15 جۇك كولىگى مەن 1 جول تالعامايتىن كولىگى قازاقستان شەكاراسىن كەسىپ ءوتتى. وندا 300 توننا جۇك بار. جۇكتىڭ قۇرامىندا سۋ، كۇرىش، قاراقۇمىق جارماسى، كامپيت، شاي، قانت جانە تاعى باسقا ازىق- تۇلىك جىبەرىلدى. سونداي- اق جىلىتقىشتار، كەرۋەنتتەر، شاتىرلار جانە تاعى باسقا دا كەرەك زاتتار تيەلگەن»، - دەدى ا. سمادياروۆ ۆەدومستۆوداعى اپتالىق باسپا ءسوز ءماسليحاتىندا.
سونىمەن قاتار ول كوپتەگەن باۋىرلاس ءارى دوستاس ەلدەردەن تەلەگرامما كەلىپ جاتقانىن ايتتى.
«ولار ءوز قولداۋىن ايتىپ، نيەت ءبىلدىرىپ جاتىر. اتاپ ايتقاندا، ەلىمىزدە جەدەل شتاب قۇرىلدى. پرەمەر- ءمينيستردىڭ بارلىق ورىنباسارى ءتيىستى وڭىرلەردە ءجۇر. ولار وڭىرلەردەگى جاعدايدى باقىلاۋدا ۇستاپ وتىر. ماتەريالدىق رەزەرۆتىڭ الەۋەتىن قولدانىپ جاتىرمىز. «قازاقستان حالقىنا» قورى مەن حالىق تا كومەكتەسىپ جاتىر. ۇكىمەت وسى باعىتتا تولىققاندى جۇمىستى اتقارىپ وتىر»، - دەدى رەسمي وكىل.
بۇل تۇرعىدا تىلشىلەر «ازىرگە، ەلىمىزگە سىرتتان كومەك كەرەك ەمەس پە؟» دەپ سۇرادى.
«قازىر ءوزىمىز بارىنە ۇلگەرىپ جاتىرمىز جانە ءتيىستى كومەك جاسالىپ وتىر. بۇل رەتتە، ناقتى رەگلامەنت جوق. ەگەر ءبىر ەل كومەكتەسەمىن دەپ شەشسە، وندا جۇكتى باعىتتاي بەرەدى. حالىقارالىق تاجىريبەگە سايكەس، مەملەكەت ءوزى كومەك سۇراسا، وندا باسقا ەلدەر گۋمانيتارلىق كومەكتى جىبەرەدى»، - دەپ ناقتىلادى ايبەك سمادياروۆ.
بۇدان بۇرىن حابارلانعانداي، جاقىندا قىرعىزستاننىڭ توتەنشە جاعدايلار مينيسترلىگىنىڭ قۇتقارۋشىلارى سۋ تاسقىنىنان زارداپ شەككەن قازاقستان حالقىنا 300 توننا گۋمانيتارلىق جۇك جىبەردى.
