سۋ تاسقىنى: مال شىعىنى وتەلىپ جاتىر

استانا. KAZINFORM - ەلىمىزدە سۋ تاسقىنىنىڭ بەتى قايتىپ، تۇرعىنداردىڭ شىعىنى وتەلىپ جاتىر. وسى رەتتە، زالالدى وتەۋ جانە دەرەكتەردى سالىستىرۋ جونىندەگى كوميسسيالاردىڭ جۇمىسى شەڭبەرىندە سۋ تاسقىنى سالدارىنان 8,2 مىڭ باس اۋىل شارۋاشىلىعى جانۋارلارىنىڭ ولگەنى راستالىپ وتىر.

ونىڭ 70 پايىزعا جۋىعى ۇساق مال. اۋىل شارۋاشىلىعى مينيسترلىگىنىڭ رەسپۋبليكالىق ەپيزووتياعا قارسى جاساعى وبلىس اكىمدىكتەرىمەن بىرلەسىپ، ولگەن جانۋارلاردى جيناۋ جانە جويۋ جۇمىستارىن جالعاستىرىپ جاتىر. بۇل تۋرالى ورتالىق كوممۋنيكاتسيالار الاڭىندا وتكەن بريفينگتە ق ر اۋىل شارۋاشىلىعى مينيسترلىگىنىڭ رەسمي وكىلى ولجاس تىلەبالدين مالىمدەدى.

ونىڭ ايتۋىنشا، ولگەن جانۋارلاردى ۋتيليزاتسيالاۋ جۇمىستارى ۆەتەريناريالىق قىزمەتتەردىڭ ەرەكشە باقىلاۋىندا. وسى ورايدا، شىعۋ تەگى كۇماندى ەتتى ساتۋ تۋرالى تاراتىلىپ جاتقان اقپارات شىندىققا جاناسپايتىنىن جەتكىزدى.

سونىمەن قاتار سۋ باسقان ايماقتاردا تۇراقتى ەپيزووتيالىق جاعدايدى ساقتاۋ ماقساتىندا ۆەتەريناريالىق باقىلاۋ جانە قاداعالاۋ كوميتەتى سۋ باسقان اۋماقتارداعى مال قورىمدارىنا قوسىمشا پروفيلاكتيكالىق دەزينفەكتسيالىق وڭدەۋ ءىس-شارالارىن جۇرگىزىلىپ جاتىر.

رەسپۋبليكالىق شتابتىڭ حاتتاماسىمەن ولگەن جانۋارلاردىڭ قۇنىن وتەۋ الگوريتمى بەكىتىلگەن. وتەماقى الۋ ءۇشىن ءوتىنىش بەرۋشىلەر زالالدى اكتىلەۋ ماقساتىندا جەرگىلىكتى كوميسسياعا جۇگىنۋى قاجەت. ەستەرىڭىزگە سالا كەتەيىك، اۋىل شارۋاشىلىعى مالدارى بويىنشا وتەماقى مولشەرى ۇلتتىق ستاتيستيكا بيۋروسى جاريالايتىن ولاردىڭ تۇرلەرى مەن جاس توپتارى بويىنشا نارىقتىق قۇنى تۋرالى دەرەكتەر نەگىزىندە انىقتالادى.

«وڭىرلەردە ولگەن جانۋارلاردىڭ يەلەرىنە وتەماقى تولەۋ جۇرگىزىلۋدە. بۇگىندە قوستاناي وبلىسىندا اۋىل شارۋاشىلىعى جانۋارلارىنىڭ 780 باس مالىنا 113,2 ميلليون تەڭگە، اقتوبە وبلىسىندا اۋىل شارۋاشىلىعى جانۋارلارىنىڭ 753 باس مالىنا 98,3 ميلليون تەڭگە سوماسىندا وتەماقى تولەندى. قاراعاندى وبلىسىندا اۋىل شارۋاشىلىعى جانۋارلارى بويىنشا زالال تولىعىمەن وتەلدى. باتىس قازاقستان وبلىسىندا وتەماقىعا 187,4 ميلليون تەڭگە ءبولىندى، وتىنىمدەردى قابىلداۋ ءراسىمى جۇرگىزىلىپ جاتىر. تولەم وسى اپتا سوڭىندا باستالادى. اتىراۋ جانە اقمولا وبلىستارىندا وتەماقى الۋعا وتىنىمدەر قابىلدانۋدا»، - دەدى ولجاس تىلەبالدين.

اۋىل شارۋاشىلىعى جانۋارلارىنىڭ يەلەرىنە وتەماقى تولەۋ بيۋدجەت قاراجاتىنان دا، بيۋدجەتتەن تىس كوزدەردەن دە جۇرگىزىلەتىنىن اتاپ وتكەن ءجون.